Ramayana Collection : रणबीर कपूरच्या 'रामायण'ची जगभरात जादू! दुसऱ्याच दिवशी २०० कोटी पार, बॉक्स ऑफिसवर रचला नवा विक्रम

'रामायण: राईज ऑफ अ लेजेंड' (Ramayana: Rise of a Legend) या चित्रपटाने पहिल्या दोन दिवसांत बॉक्स ऑफिसवर धुमाकूळ घातला आहे. अवघ्या दोन दिवसांत चित्रपटाने जगभरात २०० कोटी रुपयांचा टप्पा ओलांडला आहे. रणबीर कपूरच्या 'रामायण' चित्रपटाने जगभरात एकूण २२१.०५ कोटी रुपयांची कमाई केली आहे. या चित्रपटाने भारतातही १०० कोटी रुपयांहून अधिक नेट कमाई केली आहे. 'रामायण' चित्रपट ५ नोव्हेंबरला रिलीज झाला आहे.

Sacnilk च्या रिपोर्टनुसार, ६ नोव्हेंबर, शुक्रवारी भारतात २३,३१६ शोजच्या माध्यमातून 'रामायण' चित्रपटाने ४८.०५ कोटी रुपयांची नेट कमाई केली. पहिल्या दिवशी चित्रपटाने ६४.८५ कोटी रुपयांचे कलेक्शन केले. यामुळे चित्रपटाची भारतातील एकूण नेट कमाई ११२.९० कोटी रुपयांवर पोहोचली आहे. भारतातील एकूण ग्रॉस कमाई १३४.८० कोटी रुपये इतकी आहे.

'रामायण'ने भारतात १०० कोटींचा टप्पा ओलांडला

चित्रपटाने प्रदर्शनाच्या दुसऱ्या दिवशीच भारतात १०० कोटी रुपयांच्या नेट कमाईचा टप्पा गाठला. देशांतर्गत बाजारपेठेत या चित्रपटाला प्रामुख्याने हिंदी आवृत्तीकडून मोठा प्रतिसाद मिळाला आहे; ज्यातून शुक्रवारी ३५.५० कोटी रुपयांची कमाई झाली. कन्नड भाषेतून ५.१५ कोटी रुपयांची कमाई झाली असून, या भाषेतून सर्वाधिक (दुसऱ्या क्रमांकाचे) योगदान मिळाले आहे. त्यानंतर तेलुगू भाषेचा क्रमांक लागतो, ज्यातून ४.७५ कोटी रुपयांची कमाई झाली आहे. तमिळ आवृत्तीतून १.५० कोटी रुपये, तर मल्याळम आवृत्तीतून १.१५ कोटी रुपयांची कमाई झाली आहे. पहिल्या दोन दिवसांत, भारतातील एकूण नेट कमाईपैकी ७३.५% वाटा हिंदी आवृत्तीचा आहे.

'रामायण' जगभरात २०० कोटी पार

'रामायण'ने आंतरराष्ट्रीय बाजारपेठेतही चांगली कामगिरी केली आहे. दुसऱ्या दिवशी परदेशातून ३५ कोटी रुपयांची कमाई झाली, ज्यामुळे परदेशातील एकूण कमाई ८६.२५ कोटी रुपयांवर पोहोचली आहे.भारतातील १३४.८० कोटी रुपयांच्या एकूण कमाईसह, चित्रपटाची जागतिक स्तरावरील एकूण कमाई २२१.०५ कोटी रुपयांवर पोहोचली आहे. यामध्ये सर्व पाच भाषांमधील कमाईचा समावेश आहे.

'रामायण' स्टार कास्ट

'रामायण' पार्ट १ चे दिग्दर्शक नितेश तिवारी आणि निर्मिते नमित मल्होत्रा आहेत. 'रामायण' मध्ये रणबीर कपूर प्रभू श्रीरामाच्या भूमिकेत, तर साई पल्लवी सीतेच्या भूमिकेत, साऊथ अभिनेता यश रावणाच्या भूमिकेत झळकले आहेत. सनी देओल हनुमानाच्या भूमिकेत आणि रवी दुबे लक्ष्मणाच्या भूमिकेत आहेत. या चित्रपटात अरुण गोविल, लारा दत्ता, रकुल प्रीत सिंग, विवेक ओबेराय, कुणाल कपूर आणि काजल अग्रवाल यांसारख्या अनेक कलाकार महत्त्वाच्या भूमिका साकारल्या आहेत.