Piyush Pandey Passed Away: 'अबकी बार मोदी सरकार', 'मिले सुर मेरा तुम्हारा' टॅगलाईनचे जनक पियुष पांडे याचं निधन

Piyush Pandey Passed Away: जाहिरात क्षेत्रातील दिग्गज व्यक्ती आणि जाहिरात गुरू म्हणून ओळखले जाणारे पियुष पांडे यांचे शुक्रवारी निधन झाले. फेविकॉल, कॅडबरी आणि एशियन पेंट्स सारख्या ब्रँडसाठी लोकप्रिय जाहिराती डिझाइन करणारे पांडे यांनी वयाच्या ७० वर्षाी शेवटचा श्वास घेतला. त्यांनी १९९० च्या दशकात "मिले सूर मेरा तुम्हारा" हे प्रसिद्ध गाणे देखील लिहिले होते. पांडे संसर्गाने ग्रस्त होते. त्यांचे अंत्यसंस्कार सकाळी ११ वाजता मुंबईतील शिवाजी पार्क येथे होतील.

पियुष पांडे भारतीय जाहिरातींचा आवाज बनले

पियुष पांडे यांनी जवळजवळ चार दशके जाहिरात उद्योगात काम केले. ते ओगिल्वीचे जागतिक स्तरावरील मुख्य क्रिएटिव्ह ऑफिसर आणि भारतातील कार्यकारी अध्यक्ष होते. पांडे १९८२ मध्ये ओगिल्वीमध्ये सामील झाले आणि त्यांनी सनलाइट डिटर्जंटसाठी त्यांची पहिली जाहिरात लिहिली. सहा वर्षांनंतर, ते कंपनीच्या क्रिएटिव्ह विभागात सामील झाले आणि फेविकॉल, कॅडबरी, एशियन पेंट्स, लुना मोपेड्स, फॉर्च्यून ऑइल आणि इतर अनेक ब्रँडसाठी उल्लेखनीय जाहिराती तयार केल्या. त्यांच्या नेतृत्वाखाली, ओगिल्वी इंडियाला एका स्वतंत्र सर्वेक्षणात १२ वर्षे क्रमांक १ एजन्सी म्हणून स्थान देण्यात आले. पांडे यांनी अनेक पुरस्कार जिंकले आहेत. २०१६ मध्ये त्यांना पद्मश्री पुरस्काराने सन्मानित करण्यात आले.

अभिनयाच्या जगात प्रवेश केला

पांडे यांनी २०१३ मध्ये जॉन अब्राहम अभिनीत "मद्रास कॅफे" चित्रपटात आणि मॅजिक पेन्सिल प्रोजेक्ट व्हिडिओमध्ये काम करत (आयसीआयसीआय बँकेचे मार्केटिंग कॅम्पेन) अभिनय क्षेत्रातही पाऊल ठेवले. पांडे यांनी "मिले सूर मेरा तुम्हारा" हे गाणे लिहिले. हे गाणे देशातील राष्ट्रीय एकता आणि विविधतेला प्रोत्साहन देणारे गाणे होते, जे १९९० च्या दशकात टेलिव्हिजनद्वारे प्रत्येक घरापर्यंत पोहोचले. पांडे यांनी "भोपाल एक्सप्रेस" या लोकप्रिय चित्रपटाची पटकथा देखील लिहिली. विषेश म्हणजे त्यांनी २०१४ साली पंतप्रधान मोदींसाठी 'अबकी बार मोदी सरकार' ही टॅगलाईन लिहीली.

अर्थमंत्र्यांनी श्रद्धांजली वाहिली

व्यवसाय, जाहिरात आणि राजकारणातील मान्यवर मंडळींनी पियुष पांडे यांना श्रद्धांजली वाहिली. एक्सवरील एका पोस्टमध्ये, केंद्रीय अर्थमंत्री निर्मला सीतारमण म्हणाल्या, "भारतीय जाहिरात जगतातील एक महान आणि दिग्गज, त्यांनी दररोजच्या वाक्प्रचार, विनोद आणि संवादात बदल घडवून आणला." सीतारामन पुढे म्हणाल्या, "मला त्यांच्याशी विविध प्रसंगी संवाद साधण्याची संधी मिळाली. त्यांच्या कुटुंबियांना, मित्रांना माझी मनापासून संवेदना.