Big Boss 18 Update : चर्चांना लागला फुलस्टॉप, भाईजानने केला बिग बॉस १८ चा प्रोमो शूट

Big Boss Season 18 : बॉलीवूडचा भाईजान लोकप्रिय रिअॅलिटी शो बिग बॉस १८ चे होस्टिंग करणार की नाही याबद्दल गेल्या काही दिवसांपासून चर्चा रंगल्या होत्या. मात्र आता या चर्चांना फुलस्टॉप लागला आहे. अभिनेता सलमान खान याने नुकतेच बिग बॉस सीजन १८ चा प्रोमो शूट केला आहे. यासंदर्भातील एक व्हिडिओ बिग बॉसच्या सेटवरून समोर आला असून यात सलमान खान या शोचा प्रोमो शूट करताना दिसत आहे. सलमानला गेल्या काही महिन्यांपासून जीवे मारण्याच्या धमक्या येत असताना, या सीझनमध्ये तो शोचा भाग नसल्याच्या बातम्या येत होत्या. मात्र आता प्रोमो शूटिंगची बातमी आल्याने त्याच्या चाहत्यांना दिलासा मिळाला आहे.

माध्यमांच्या रिपोर्टनुसार, सलमान खानने शोचे शूटिंग सुरू केले आहे. अलीकडेच सलमान खानने मुंबई फिल्मसिटीमध्ये बिग बॉस 18 चा प्रोमो शूट केला. शूटिंग संपल्यानंतर सलमान खानने पापाराझींना पोज दिली. ब्लेझर आणि पँटसह नेव्ही ब्लू शर्ट परिधान केलेल्या फॉर्मल लूकमध्ये अभिनेता दिसला.

बिग बॉस 18 च्या प्रोमोच्या शूटिंगच्या काही वेळ आधी सलमान खान त्याच्या आगामी चित्रपट सिकंदरचे शूटिंग करत होता. अॅक्शन सीनच्या शूटिंगदरम्यान सलमान खानच्या बरगड्यांना दुखापत झाली होती. सध्या तो पूर्णपणे बरा झालेला नाही, असे असूनही, कामाच्या कमिटमेंटमुळे त्याने बिग बॉस 18 चा प्रोमो शूट केला आहे. बिग बॉस 18 चा ग्रँड प्रीमियर 5 ऑक्टोबर रोजी होणार आहे.

सलमान शो करणार नसल्याची होती चर्चा

सलमान खान बिग बॉस १८ होस्ट करणार नसल्याची चर्चा अनेक दिवसांपासून होती. वास्तविक, १४ एप्रिल रोजी त्याच्या गॅलेक्सी अपार्टमेंटमध्ये गोळ्या झाडण्यात आल्या होत्या. याशिवाय त्याला अनेक वेळा जीवे मारण्याच्या धमक्याही आल्या आहेत. सुरक्षेच्या कारणास्तव तो यावेळी बिग बॉस होस्ट करणार नसल्याचे वृत्त होते.