Mumbai Pune Mumbai 4 : भन्नाट गाणी अन् स्वप्नील-मुक्ताची जबरदस्त केमिस्ट्री; 'मुंबई पुणे मुंबई ४' येतोय, पाहा VIDEO

मराठीतला लोकप्रिय चित्रपट 'मुंबई पुणे मुंबई' पुन्हा लवकरच प्रेक्षकांच्या भेटीला येणार आहे. आजवर 'मुंबई पुणे मुंबई'चे तीन भाग प्रदर्शित झाले आहेत. तिन्ही भागांना प्रेक्षकांकडून चांगला प्रतिसाद मिळाला. 'मुंबई पुणे मुंबई' ही एक प्रेमकथा आहे. या चित्रपटात प्रेक्षकांची आवडती जोडी स्वप्नील जोशी आणि मुक्ता बर्वे एकत्र पाहायला मिळतात. तिन्ही चित्रपटातील गाणी खूपच भन्नाट आणि रोमँटिक आहेत. स्वप्नील जोशी आणि मुक्ता बर्वे यांच्या केमिस्ट्रीचे कायम कौतुक होत आले आहे.

आता सोशल मीडियावर एक व्हिडीओ तुफान व्हायरल होत आहे. ज्यामध्ये 'मुंबई पुणे मुंबई 4 'ची घोषणा करण्यात आली आहे. म्हणजे लवकरच 'मुंबई पुणे मुंबई' चा चौथा भाग प्रेक्षकांच्या भेटीला येणार आहे. व्हायरल होणाऱ्या व्हिडीओमध्ये 'मुंबई पुणे मुंबई' च्या पहिल्या तीन भागांची छोटी झलक पाहायला मिळत आहे आणि शेवटी 'मुंबई पुणे मुंबई 4 'ची (Mumbai Pune Mumbai 4 ) घोषणा करण्यात आली आहे. या व्हिडीओवर प्रेक्षकांनी खूप कमेंट्स केल्या आहेत. प्रेक्षक 'मुंबई पुणे मुंबई 4 ' आणि स्वप्नील जोशी आणि मुक्ता बर्वे एकत्र पाहायला उत्सुक आहेत.

व्हिडीओच्या कॅप्शनमध्ये लिहिण्यात आले की," मराठीतील पहिला फ्रेंचायझी चित्रपट... आता त्याचा चौथा भाग येतोय...मुंबई पुणे मुंबई 4" तर व्हिडीओवर देखील हटके कॅप्शन दिले आहे. लिहिलं की, "15 वर्षांपूर्वी सुरू झाला एक रोमँटिक प्रवास..." त्यामुळे प्रेक्षक खूपच खुश आहेत. 'मुंबई पुणे मुंबई 4 ' चित्रपटाचे दिग्दर्शन सतिश राजवाडे यांचे आहे. तर चित्रपटाची निर्मिती संजय छाब्रिया आणि अमित भानुशाली करणार आहेत.

मुंबई पुणे मुंबईचा पहिला 2010ला रिलीज झाला होता. मुंबईची मुलगी गौरी आणि पुण्याचा मुलगा गौतम यांच्या लव्ह स्टोरी पाहायला मिळाली. त्यानंतर 2015मध्ये 'मुंबई पुणे मुंबई 2 ' रिलीज करण्यात आला, ज्यात लगीन घाई पाहायला मिळाली. त्यानंतर 2018 मध्ये 'मुंबई पुणे मुंबई 3 ' प्रदर्शित झाला. ज्यात गौरी आणि गौतम आई-बाबा झाले. त्यांच्या आयुष्यात गोंडस बाळ आले. आता 'मुंबई पुणे मुंबई 4 ' कोणती कथा घेऊन येणार आणि गौरी आणि गौतमच्या आयुष्यात काय बदल होणार हे पाहणे मनोरंजक ठरणार आहे.