Pravin Tarde : 'ही देवाची देण...' प्रवीण तरडेने केलं 'फुलवंती'चं कौतुक, म्हणाला...

सध्या मराठी अभिनेत्री प्राजक्ता माळी (Prajakta Mali) तिच्या 'फुलवंती' (Phullwanti) या चित्रपटामुळे चर्चेत आहे. या चित्रपटाला प्रेक्षक भरपूर प्रेम करत आहेत. या चित्रपटातून प्राजक्ताने निर्मिती क्षेत्रात पदार्पण केले आहे.

प्राजक्ताने नुकताच एक व्हिडिओ शेअर केला आहे. ज्यात ती प्रवीण तरडे (Pravin Tarde) यांचे कौतुक करताना पाहायला मिळत आहे. व्हिडिओत पाहू शकता की, प्राजक्ता माळीला विचारण्यात आले की, "या संपूर्ण प्रवासात तुला मिळालेली सेटवर सर्वात चांगली कॉम्प्लिमेंट कोणती?" यावर प्राजक्ताने सांगितले की, "मला बेस्ट कॉम्प्लिमेंट प्रवीण सरांकडून मिळाली. आम्ही बॅक टू बॅक सलग सहा दिवस डान्स शूट करत होतो. तेव्हा साधारण चौथ्या-पाचव्या दिवशी प्रवीण सर म्हणाले की, तू जे नाचतेयंस ते दैवी आहे. सलग काही दिवस डान्स सीक्वेन्स शूट करताना एक एवढी ऍनर्जी राखून ठेवणे म्हणजे ही खरंच देवाची देण आहे"

प्राजक्ता पुढे म्हणाली की,"'फुलवंती' हे तिचे आजवरच्या कारकिर्दीतील सर्वात आवडते पात्र आहे. मी एक नर्तिका आहे आणि हे पात्र देखील एका नर्तिकेचे आहे. फुलवंती हे माझं स्वप्न होतं."

प्रवीण तरडे यांनी 'फुलवंती'चे संवाद लेखन केले आहे. तर 'फुलवंती' चित्रपटाच्या दिग्दर्शनाची धुरा अभिनेत्री स्नेहल तरडे यांनी सांभाळली. या चित्रपटात महाराष्ट्राची हास्यजत्राचे कलाकारही पाहायला मिळत आहेत. 'फुलवंती' हा चित्रपट कादंबरीवर आधारित आहे. या चित्रपटात प्राजक्ता माळीसोबत गश्मीर महाजनी देखील मुख्य भूमिकेत पाहायला मिळत आहे.