Janhvi Kapoor: हंडी फोडताना 'भारत माता की जय' म्हणल्यामुळे जान्हवी कपूर ट्रोल; अभिनेत्रीने व्हिडीओ शेअर करत सुनावले खडेबोल

Janhvi Kapoor: १६ ऑगस्ट रोजी मुंबईत झालेल्या दहीहंडी कार्यक्रमात अभिनेत्री जान्हवी कपूर सहभागी झाली होती. जन्माष्टमीनिमित्त तिने या कार्यक्रमात हंडी फोडताना 'भारत माता की जय' म्हटले होते. याबद्दल तिच्यावर बरीच टीका झाली. आता अभिनेत्रीने यावर प्रतिक्रिया देत कार्यक्रमात 'भारत माता की जय' का म्हटले हे सांगितले आहे.

जान्हवी कपूरने इन्स्टाग्राम स्टोरीमध्ये दहीहंडीची एक छोटी क्लिप शेअर केली आहे, ज्यामध्ये ती हंडी फोडताना 'भारत माता की जय' असा जयघोष करताना दिसत आहे. या स्टोरीच्या कॅप्शनमध्ये तिने लिहिले आहे, 'फक्त संदर्भासाठी. जर मी काही बोलले नसते तरी ते काही लोकांना आवडल नसतं आणि मी अभिमानाने जयघोष केला तोही मीम मटेरियल म्हणून एडिट करण्यात आला आहे.'

दररोज 'भारत माता की जय' म्हणेल

जान्हवी कपूर पुढे लिहिते, 'आतापासून मी फक्त जन्माष्टमीलाच नाही तर दररोज भारत माता की जय म्हणेन!' या कार्यक्रमात जान्हवीने मराठीत भाषणही दिले, ज्यामध्ये तिने सर्वांना जन्माष्टमीच्या शुभेच्छा दिल्या आणि २९ ऑगस्ट रोजी चित्रपटगृहात प्रदर्शित होणारा 'परम सुंदरी' हा चित्रपट पाहण्याची विनंती केली.

जान्हवी कपूरचा चित्रपट

'परम सुंदरी' चित्रपटात जान्हवी कपूर आणि सिद्धार्थ मल्होत्रा मुख्य भूमिकेत आहेत. यात दिल्लीतील एका मुलाची आणि केरळातील एका मुलीची कहाणी दाखवण्यात येईल. त्यांची मैत्री आणि प्रेमाचे चित्रीकरण करण्यात आले आहे. या चित्रपटात राजीव खंडेलवाल आणि आकाश दहिया देखील मुख्य भूमिकेत आहेत. दिनेश विजान निर्मित हा चित्रपट २९ ऑगस्ट रोजी प्रदर्शित होणार आहे.