Yuzvendra Chahal Dhanashree Verma: 'युजवेंद्र चहल आणि धनश्री वर्मा पती-पत्नी नाहीत...! कायदेशीररित्या वेगळे झाल्यानंतर वकिलांचं मोठं विधान

Yuzvendra Chahal Dhanashree Verma Divorce : भारतीय क्रिकेटपटू युजवेंद्र चहलचे वकील नितीन कुमार गुप्ता यांनी गुरुवारी माध्यमांशी बोलताना सांगितले की, न्यायालयाने घटस्फोटाचा आदेश मंजूर केला आहे. त्यामुळे युजवेंद्र चहल आणि धनश्री वर्माचा अधिकृतपणे घटस्फोट झाला आहे. न्यायालयाने घटस्फोटाचा आदेश मंजूर केला आहे. न्यायालयाने दोन्ही पक्षांची संयुक्त याचिका स्वीकारली आहे. पक्ष दोघेही आता पती-पत्नी नाहीत," असे माध्यमांशी बोलताना गुप्ता म्हणाले.

काल, मुंबई उच्च न्यायालयाचे न्यायमूर्ती माधव जामदार यांनी या कपलच्या कूलिंग-ऑफ कालावधीत सूट देत कुटुंब न्यायालयाला येत्या इंडियन प्रीमियर लीग (आयपीएल) मध्ये चहलच्या सहभागाचा विचार करून घटस्फोटाच्या याचिकेवर गुरुवारीच निर्णय घेण्याचे निर्देश दिले.

न्यायमूर्ती जामदार यांच्या नेतृत्वाखालील खंडपीठाने मान्य केले की हे जोडपे अडीच वर्षांहून अधिक काळ वेगळे राहत होते आणि मध्यस्थी दरम्यान झालेल्या करारानुसार पोटगी देण्याबाबतच्या संमतीच्या अटींचे त्यांनी पूर्णपणे पालन केले होते. हिंदू कायद्यानुसार, जर पती-पत्नी एक वर्ष किंवा त्याहून अधिक काळ वेगळे राहत असतील, तर ते परस्पर संमतीने घटस्फोटासाठी अर्ज करू शकतात. तथापि, हिंदू विवाह कायद्याच्या कलम १३ब(२) नुसार समेट होण्याची शक्यता निर्माण करण्यासाठी अर्ज दाखल केल्यापासून किमान सहा महिन्यांचा वैधानिक कूलिंग-ऑफ कालावधी अनिवार्य आहे.

२०१७ च्या एका ऐतिहासिक निर्णयात, सर्वोच्च न्यायालयाने असे म्हटले होते की सहा महिन्यांचा कूलिंग-ऑफ कालावधी अनिवार्य नाही आणि जर न्यायालयाला खात्री झाली की जोडप्याने पुन्हा एकत्र राहण्याची कोणतीही शक्यता नाही तर तो रद्द केला जाऊ शकतो.

चहल आणि धनश्री दोघेही गुरुवारी न्यायालयात आले होते. माध्यमांनी त्यांचे फोटो काढू नये म्हणून दोघांनी मास्क घातले होते. धनश्री आणि चहल यांनी डिसेंबर २०२० साली गुरुग्राममध्ये एका खाजगी समारंभात लग्न केले.