Gaurav Khanna: 'ती माझी पत्नी आहे...'; सोशल मीडियावरील घटस्फोटाच्या चर्चांना गौरव खन्नाचे सडेतोड उत्तर

Gaurav Khanna: अभिनेता गौरव खन्ना आणि त्याची पत्नी अभिनेत्री आकांक्षा चमोला यांच्या वैवाहिक आयुष्याबाबत गेल्या काही दिवसांपासून सोशल मीडियावर विविध चर्चा रंगल्या आहेत. नेटफ्लिक्सच्या लॉक अप या शोमध्ये आकांक्षा चमोलाने घटस्फोटाबाबत केलेल्या वक्तव्यानंतर या चर्चांना आणखी उधाण आले. आता या सर्व चर्चांवर गौरव खन्नाने प्रथमच प्रतिक्रिया देत आपली भूमिका स्पष्ट केली आहे.

'लॉक अप' या कार्यक्रमात आकांक्षा चमोलाने, "जर मी या शोमध्ये जास्त दिवस राहिले, तर बाहेर पडल्यानंतर माझा घटस्फोट झालेला असेल," असे वक्तव्य केले होते. तिच्या या विधानाचा व्हिडिओ सोशल मीडियावर मोठ्या प्रमाणात व्हायरल झाला. त्यानंतर दोघांच्या नात्यात दुरावा आल्याच्या चर्चांना वेग आला.

या अफवांवर अखेर गौरव खन्नाने मौन सोडले. एका मुलाखतीत त्याने सांगितले की, 'खरं सांगायचं तर, परिस्थिती अगदी पूर्वीसारखीच आहे. आमचं प्रेम अजूनही तितकंच घट्ट आहे आणि मी नेहमीच आकांक्षाला पाठिंबा देत राहीन शेवटी ती माझी पत्नी आहे. तिच्यावर प्रेम केल्यानंतर मी माघार का घेईन?

गौरव आणि आकांक्षा यांचे लग्न २०१६ मध्ये झाले. दोघेही अनेकदा सोशल मीडियावर एकमेकांसोबतचे फोटो आणि व्हिडिओ शेअर करत असतात. त्यामुळे त्यांच्या नात्यात कोणताही तणाव नसल्याचे चाहतेही सांगत आहेत. गौरवच्या या स्पष्टीकरणानंतर त्यांच्या घटस्फोटाच्या चर्चांना पूर्णविराम मिळण्याची शक्यता आहे.