'Gadar 2' Box Office Collection: 'गदर 2'चा तिसऱ्या आठवड्यातही बॉक्स ऑफिसवर दरारा; 456 कोटींचा गल्ला पार

Gadar 2 Third Weekend Collection:

सनी देओल आणि अमीषा पटेल यांचा 'गदर २' चित्रपटचा प्रदर्शनाच्या १५ दिवसांनी देखील बॉक्स ऑफिसवर दरारा आहे. चित्रपटाचे लक्ष आता ५०० कोटींकडे आहे.

'गदर २' चित्रपटाने पहिल्या आठवड्यात २८४.६३ कोटींची कमाई केली होती. तर दुसऱ्या आठवड्यात चित्रपटाच्या कमाईत घसरण झाली आणि चित्रपटाने फक्त १३४.४७ कोटींची कमाई केली.

तिसऱ्या आठवड्यातील रविवारी चित्रपटाने १७ कोटींचे कलेक्शन केले आहे. तिसऱ्या शुक्रवारी चित्रपटाचे कलेक्शन सर्वात कमी म्हणजे १० कोटी इतकेच झाले होते. परंतु शनिवार आणि रविवारी चित्रपटाच्या कलेक्शनमध्ये वाढ झाली. तर चित्रपटाचे एकूण कलेक्शन आहे ४५६.९५ कोटी, असे सॅकनिल्कच्या अहवालात सांगण्यात आले आहे.

अनिल शर्मा दिग्दर्शित 'गदर २' ११ ऑगस्टला प्रदर्शित झाला. हा चित्रपट २००१ साली प्रदर्शित झालेल्या 'गदर एक प्रेमकथा' चित्रपटचा सिक्वेल आहे.

'गदर 2'वर सनी देओलची प्रतिक्रिया

अक्षय कुमारच्या OMG 2 सह रिलीज होऊनही गदर 2 ने देशांतर्गत बॉक्स ऑफिसवर मोठी कमाई केली. अलीकडेच, गदर 2 टीमने चित्रपटाच्या प्रचंड यशाबद्दल पत्रकार परिषद घेतली.

प्रेक्षकांचे 'गदर 2'वरील प्रेम पाहून सनी देओलने प्रतिक्रिया देत म्हटले होते, "चित्रपट प्रदर्शित होण्यापूर्वी मी खूप टेंशनमध्ये होतो. जेव्हा चित्रपट प्रदर्शित झाला तेव्हा मी संपूर्ण रात्र रडलो आणि हसलो. माझे वडील आजूबाजूला होते. ते मला पाहत होते. मी त्यांना म्हणालो, 'मी दारू पीत नाही. मी खूप खुश आहे, मी काय करू'." (Latest Entertainment News)