Raju Srivastav Health Update: राजू श्रीवास्तवला शुद्धीवर येण्यासाठी किती दिवस लागू शकतात?, डॉक्टर म्हणाले...

मुंबई: प्रसिद्ध कॉमेडियन आणि अभिनेता राजू श्रीवास्तवला १० ऑगस्ट रोजी दिल्लीतील एम्स रुग्णालयात(AIMS Hospital) दाखल करण्यात आले होते. तेव्हापासून त्याची प्रकृती चिंताजनक आहे. राजू श्रीवास्तव (Raju Srivastav) अजूनही शुद्धीवर आलेला नाही. त्यामुळे चाहतेही चिंतेत आहेत. डॉक्टरांची टीम राजूच्या प्रकृतीवर लक्ष ठेवून आहे. त्याचवेळी राजू श्रीवास्तवच्या प्रकृतीशी संबंधित एक नवीन अपडेट समोर आली आहे. या नवीन अपडेटमुळे चिंताग्रस्त झालेल्या त्याच्या चाहत्यांना नक्कीच काहीसा दिलासा मिळू शकेल.

राजू श्रीवास्तवला रुग्णालयात दाखल करून ५ दिवस झाले आहेत, परंतु अद्याप राजू शुद्धीवर आला नाही. नुकतेच राजूच्या कुटुंबीयांकडून जारी करण्यात आलेल्या निवेदनात म्हटले आहे की, 'राजू श्रीवास्तवच्या प्रकृतीत सुधारणा होत आहे. त्याबरोबर तो उपचारांना प्रतिसाद देत आहे'. तसेच त्याच्या हार्ट ब्लॉकेजसाठी स्टेंट घालण्यात आल्याचे मीडिया रिपोर्ट्समध्ये सांगण्यात आले आहे.

१४ ऑगस्टला राजू श्रीवास्तवचा एमआरआय रिपोर्ट आला. या रिपोर्टनुसार, तणावामुळे राजूच्या मेंदूतील काही मज्जातंतू दाबल्या गेल्याचे समोर आले आहे. त्यामुळे राजूच्या मेंदूपर्यंत ऑक्सिजनचा पुरवठा होत नाही. राजूला बरे होण्यासाठी अजून १० दिवस लागतील, असे डॉक्टरांचे म्हणणे आहे.

मीडिया रिपोर्टनुसार, राजू श्रीवास्तवची यापूर्वी दोनदा अँजिओप्लास्टी केली आहे. तसेच राजूच्या हृदयात ९ स्टेंट आधीच घालण्यात आले आहेत. यावेळी तिसऱ्यांदा ही अँजिओप्लास्टी करण्यात आली. मात्र, राजू श्रीवास्तव अजूनही व्हेंटिलेटरवर असून डॉक्टरांची टीम त्यांच्या प्रकृतीवर लक्ष ठेवून आहे.