Asmita deshmukh: 'देवमाणूस' फेम अभिनेत्रीची फसवणूक; सेलिब्रिटींना विनंती करत केले सतर्कतेचे आवाहन

Asmita deshmukh Fraud: ‘देवमाणूस’ मालिकेमुळे घराघरात पोहोचलेली आणि लोकप्रिय मराठी अभिनेत्री अस्मिता देशमुख अलीकडेच आर्थिक फसवणुकीची शिकार झाली आहे. स्वतः अस्मिताने सोशल मीडियावर एक व्हिडिओ शेअर करत या घटनेबाबत माहिती दिली असून तिच्या व्हिडिओनंतर चाहत्यांमध्ये आणि मराठी कलाविश्वात मोठी खळबळ उडाली आहे.

ही घटना एका दहीहंडी कार्यक्रमाशी संबंधित आहे. अस्मिता देशमुखला या कार्यक्रमासाठी इव्हेंट मॅनेजर सुजित सरकाळे यांनी संपर्क साधला होता. नेहमीप्रमाणे, कलाकार जेव्हा एखाद्या कार्यक्रमाला हजेरी लावतात तेव्हा मानधनाची खात्री करून घेतात. अस्मिताने देखील तशी खात्री मागितली होती. त्यावर आयोजकांकडून तिला मानधन दिल्याचा एक स्क्रीनशॉट पाठवला. या स्क्रीनशॉटमध्ये पैसे ट्रान्सफर झाल्याचे दाखवले गेले होते. मात्र प्रत्यक्षात तिच्या बँक खात्यात एक रुपयाही जमा झाला नव्हता.

पैसे न मिळाल्याची शंका अस्मिताला आली तेव्हा तिने सरकाळेंशी संपर्क साधला. त्यावेळी त्यांनी “सर्व्हर डाऊन आहे”, “बँकेकडून उशीर होतोय”, “तांत्रिक अडचण आहे” अशा सबबी सांगून तिला काही दिवस वाट पाहण्यास सांगितले. अस्मिताने संयम ठेवला आणि काही दिवस थांबली देखील, पण तरीही पैसे आले नाहीत.

यानंतर तिने वारंवार संपर्क करून पैसे परत देण्याची मागणी केली. परंतु अनेकदा समजावून सांगूनही पैसे मिळाले नाहीत. शेवटी तिने या प्रकरणाची पोलिसांत तक्रार नोंदवली. मात्र पोलिसांकडे तक्रार करूनही फारसा काही उपयोग झाला नाही, असे अस्मिताने सांगितले. या व्हिडिओत अस्मिताने स्पष्टपणे सांगितले की, आजकाल अनेक कार्यक्रम आयोजक गुगलपे, फोनपे, पेटीएम यांसारख्या डिजिटल पेमेंट अॅप्सचा वापर करून बनावट स्क्रीनशॉट पाठवतात आणि कलाकारांची फसवणूक करतात. त्यामुळे कलाकारांनी फसवणुकीपासून वाचण्यासाठी मानधन प्रत्यक्ष खात्यात जमा झाले आहे का, याची खात्री करणे अत्यावश्यक आहे.

अस्मिताने इतर कलाकारांना देखील आवाहन केले की, कुठल्याही इव्हेंटमध्ये जाण्याआधी आयोजकांची चौकशी करूनच करार करावा आणि फक्त स्क्रीनशॉटवर विश्वास ठेवू नये. तिच्या या अनुभवामुळे पुन्हा एकदा कलाकारांच्या आर्थिक सुरक्षिततेचा मुद्दा ऐरणीवर आला आहे.