Deepika Padukone : दीपिका पादुकोणचं देओल कुटुंबाशी नातं जुळणार, बहीण अनिशा लवकरच लग्नबंधनात अडकणार, सोशल मीडियावर चर्चा

सध्या मनोरंजन सृष्टीत लगीन घाई पाहायला मिळत आहे. अशात आता बॉलिवूडमधून आनंदाची बातमी समोर आली आहे. बॉलिवूडची मस्तानी दीपिका पादुकोणची धाकटी बहीण अनिशा पदुकोण लवकरच लग्न बंधनात अडकणार आहे. अनिशा पदुकोण खूप वेळापासून रोहन आचार्यला डेट करत आहे त्यामुळे आता ही जोडी लवकर विवाह बंधनात अडकणार असल्याची चर्चा सोशल मीडियावर चांगली रंगली आहे.

रोहन आचार्यचे देओल कुटुंबाशी खास नाते आहे. त्यामुळे दीपिका पादुकोण-रणवीर सिंग हे लवकरच सनी देओलचे नातेवाईक होणार आहेत. रोहन आचार्य हा प्रसिद्ध चित्रपट निर्माते बिमल रॉय यांचा पणतू आहे. तसेच तो सनी देओलच्या सुनेचा भाऊ आहे. रोहनची आई चिमू आचार्य या बिमल रॉय यांची मुलगी रिंकी रॉय भट्टाचार्य यांची मुलगी आहे. तसेच सनी देओलचा लेक करण देओलची बायको दृशा आचार्य ही रोहन आचार्यची बहीण आहे. म्हणजेच रोहन हा सनी देओलच्या सुनेचा भाऊ आहे.

रोहन आचार्य आणि अनिशा पादुकोण यांचे लग्न झाल्यावर पादुकोण आणि देओल कुटुंब नातेवाईक बनतील. अनिशा पादुकोण लाइमलाइटपासून दूर आहे. ती एक व्यावसायिक गोल्फर आहे. अनिशा आई-वडीलांसोबत बंगळूरुमध्ये राहते. मात्र अद्याप रोहन आचार्य आणि अनिशा पदुकोण यांच्या लग्नाबद्दल कोणतीही अधिकृत घोषणा करण्यात आली नाही.

रोहन आचार्यला दीपिका आणि रणवीर दोघेही इन्स्टाग्रामवर फॉलो करतात. मीडिया रिपोर्ट्सनुसार, रणवीर सिंहचे आई-वडील आणि रोहनचे वडील सुमित आचार्य हे चांगले मित्र आहेत. एका कौटुंबिक समारंभात अनिशा आणि रोहन यांची भेट झाली. त्यानंतर दोघे बोलू लागले. त्यांच्यात मैत्री झाली. त्यानंतर मैत्रीचे रूपांतर प्रेमात झाले. अनिशा पादुकोण ही 34 वर्षांची आहे. अनिशा पादुकोण 'लाइव्ह लव्ह लाफ फाउंडेशन'ची ती प्रमुख आहे. रोहन आचार्य देखील उद्योजक आहे. तो दुबईमध्ये आहे. तो कौटुंबिक ट्रॅव्हल व्यवसायात काम करतो.