कोरिओग्राफर शिवशंकर यांचे कोरोनामुळे निधन

हैदराबाद : तेलगू सिनेसृष्टीमधील प्रसिद्ध कोरिओग्राफर शिवा शंकर यांचे हैद्राबाद येथील हॉस्पिटलमध्ये निधन झाले आहे. मागील काही दिवसांपासून शिवा शंकर यांच्यावर कोरोनावरील उपचार सुरू होते. या उपचाराकरिता अभिनेता सोनू सूद ने आर्थिक मदत देखील केली होती. अनेक अभिनेते आणि चित्रपट निर्मात्यांनी शिवा यांच्या निधनावर शोक व्यक्त केला आहे. सोनूने शिवा यांचा फोटो शेअर करत एक भावनिक पोस्ट देखील शेअर केली आहे.

हे देखील पहा-

कोरोना विषाणूची लागण झाल्यानंतर शिवशंकर यांची प्रकृती खालावत गेली होती. त्यांच्या मोठ्या मुलाला देखील कोरोनाची लागण झाली असून त्याच्यावर देखील उपचार सुरू आहेत. रविवारी रात्री शिवा शंकर यांच्या निधनानंतर सोनूने ट्वीट करत सांगितले की, 'शिवशंकर मास्टर जी यांच्या निधनाच्या वृत्ताने माझे मन खूप दुःखी झाले आहे. मी त्यांना वाचवण्याचा सर्वतोपरी प्रयत्न केला पण देवाला काही वेगळेच मंजूर होते. मला मास्तरजींची नेहमीच आठवण येणार आहे. देव त्यांच्या कुटुंबीयांना हे दुःख सहन करण्याची शक्ती देवो. सिनेमा तुम्हाला कधीच विसरणार नाही सर.

तेलगू दिग्दर्शक एसएस राजामौली यांनी देखील ट्वीट करून शोक व्यक्त केला आहे, 'प्रसिद्ध नृत्यदिग्दर्शक शिवशंकर मास्टर गारू यांचे निधन झाले, हे जाणून दुःख झाले आहे. 'मगधीरा' मध्ये त्यांच्याबरोबर काम करणे हा एक संस्मरणीय अनुभव होता. त्यांच्या आत्म्याला शांती लाभो. त्यांच्या कुटुंबाप्रती माझ्या संवेदना.' दरम्यान, कोरोनाची लागण झाल्यानंतर शिवा यांना तातडीने हॉस्पिटलमध्ये दाखल करण्यात आले होते. त्यांच्यावर उपचारांसाठी सोनू सूद मदतीसाठी पुढे आला होता. सोनूशिवाय अभिनेता धनुष देखील शंकर यांच्या मदतीसाठी पुढे आला आणि त्याना देखील आर्थिक मदत केली होती. शिवा शंकर यांनी नृत्य दिग्दर्शनाव्यतिरिक्त तेलगू आणि तमिळ चित्रपटांमध्ये काम केले आहेत.

Edited By- Digambar Jadhav