Upcoming Bollywood Movies: 'फायटर' ते 'सिंघम अगेन', २०२४ मध्ये कोण-कोणते चित्रपट होणार रिलीज; संपूर्ण यादीच आली समोर...

Upcoming Bollywood Movies In 2024 Released

२०२३ हे वर्ष बॉलिवूडकरांसाठी खास ठरलं, तितकंच २०२४ हे वर्ष सुद्धा खास असणार आहे. २०२४ मध्ये ॲक्शन, हॉरर- कॉमेडी, सस्पेन्स थ्रिलर आणि कॉमेडी अशा वेगवेगळ्या धाटणीचे चित्रपट प्रेक्षकांना पाहायला मिळणार आहे.

खरंतर २०२४ मध्ये रिलीज होणाऱ्या चित्रपटांची चर्चा २०२३ पासून सुरू आहे. २०२४ यावर्षामध्ये कोणकोणते मोस्ट अवेटेड चित्रपट रिलीज होणार आहेत, जाणून घेऊया...

फायटर (Fighter)

सिद्धार्थ आनंद दिग्दर्शित 'फायटर' चित्रपटाच्या ट्रेलरने आणि गाण्यांनी प्रेक्षकांची उत्सुकता ताणून धरली आहे. येत्या २५ जानेवारीला हा चित्रपट रिलीज होणार असून हृतिक रोशन, दीपिका पादुकोण आणि अनिल कपूर या चित्रपटात महत्त्वाच्या भूमिकेत आहेत.

बडे मियाँ छोटे मियाँ (Bade Miyan Chote Miyan)

अली अब्बास जफर दिग्दर्शित 'बडे मियाँ छोटे मियाँ' चित्रपट येत्या १० एप्रिल २०२४ ला हा चित्रपट रिलीज होणार आहे. चित्रपटामध्ये प्रमुख भूमिकेत टायगर श्रॉफ आणि अक्षय कुमार हे दोघेही आहेत.

सिंघम अगेन (Singham Again)

रोहित शेट्टी दिग्दर्शित 'सिंघम अगेन' हा चित्रपट येत्या १५ ऑगस्ट २०२४ला थिएटरमध्ये रिलीज होणार आहे. या चित्रपटामध्ये प्रेक्षकांना अनेक नवी स्टारकास्ट पाहायला मिळणार आहे.

स्त्री 2 (Stree 2)

श्रद्धा कपूर, अपारशक्ती खुराणा आणि वरुन धवनचा हा हॉरर-कॉमेडी चित्रपट असणार आहे. 'स्त्री 2'मध्ये राजकुमार राव आणि पंकज त्रिपाठी यांचा ही अभिनय पाहायला मिळणार आहे. हा चित्रपट ३० ऑगस्ट २०२४ मध्ये रिलीज होणार आहे.

रेड 2 (Raid 2)

अजय देवगणच्या 'रेड २' या सस्पेन्स ड्रामा चित्रपटामध्ये प्रेक्षकांना अनेक नवीन स्टारकास्ट पाहायला मिळणार आहे. अमय पटनायक आता दुसऱ्या पार्टमध्ये कोणाच्या घरावर 'रेड' टाकणार हे पाहणं औत्सुक्याचं ठरणार आहे.

भूल भुलैया 3 (Bhool Bhulaiyaa 3)

'भूल भुलैया', 'भूल भुलैया २'च्या भरघोस यशानंतर 'भूल भुलैया ३'ची घोषणा करण्यात आली आहे. कार्तिक आर्यनने सोशल मीडियावर प्रोमो शेअर करत चित्रपटाची घोषणा केली होती. दिवाळी २०२४ मध्ये हा चित्रपट प्रेक्षकांच्या भेटीला येणार आहे.

वेलकम टू द जंगल- (Welcome To The Jungle)

'वेलकम टू द जंगल' चित्रपटामध्ये प्रमुख भूमिकेत अक्षय कुमारसोबत अरशद वारसी आणि संजय दत्त सुद्धा दिसणार आहे. चित्रपटाचा फर्स्ट लूक गेल्या वर्षीच प्रदर्शित झाला होता, तेव्हापासून प्रेक्षकांना चित्रपटाची उत्सुकता आहे. चित्रपट येत्या २० डिसेंबर २०२४ ला प्रदर्शित होणार आहे.