Famous Actor : धक्कादायक! प्रसिद्ध अभिनेत्याच्या भावाला लाच घेताना रंगेहात पकडलं, पोलिसांची मोठी कारवाई

बॉलिवूडमधून धक्कादायक बातमी समोर आली आहे. प्रसिद्ध अभिनेता आणि चित्रपट निर्माता यशपाल शर्मा यांचा भाऊ आणि 'जल सेवा मंडळा'तील जिल्हा-स्तरीय अधिकारी राजेश कुमार यांना ३,००० रुपयांची लाच घेतल्याच्या आरोपावरून हरियाणाच्या लाचलुचपत प्रतिबंधक विभागाने (ACB) अटक केली.

एसीबीच्या माहितीनुसार, राजगड-चंदीगड महामार्गाजवळील शेतजमिनीच्या वसाहतीसाठी कालव्याच्या पाण्याद्वारे सिंचनाच्या व्यवस्थेशी संबंधित 'सीओओ' (COO) तयार करण्याच्या बदल्यात कुमार यांनी एका तक्रारदाराकडे या पैशांची मागणी केली होती. तक्रारीची पडताळणी केल्यानंतर, एसीबीच्या हिसार पथकाने स्वतंत्र साक्षीदारांच्या उपस्थितीत सापळा रचला. यावेळी ३,००० रुपयांची लाच स्वीकारताना कुमार यांना पकडण्यात आले. 'भ्रष्टाचार प्रतिबंधक कायदा, १९८८' च्या कलम ७ अन्वये गुन्हा दाखल करण्यात आला असून, पुढील तपास सुरू आहे.

टाइम्स ऑफ इंडियाच्या वृत्तानुसार, हिसारमध्ये राजेशविरुद्ध 'भ्रष्टाचार प्रतिबंधक कायद्या'न्वये गुन्हा दाखल करण्यात आला आहे. त्याची चौकशी केली जात असून पुढील तपास सुरू आहे. राजेशची एक-दोन दिवसांत पदोन्नती होणार होती आणि त्यासाठीचे आदेशही जारी झाले होते. अटकेनंतर एसीबीच्या अधिकाऱ्यांनी त्याच्या कार्यालयातही त्याची चौकशी केली.

राजेशचा भाऊ घनश्याम शर्मा याने राजेशने लाच घेतल्याचा आरोप फेटाळून लावला. त्याने दावा केला की, ती रक्कम एका 'चलान'च्या (सरकारी पावती/शुल्क) प्रक्रियेसाठीचे अधिकृत शुल्क होते आणि त्या बदल्यात अधिकृत पावतीही देण्यात आली होती. घडलेल्या प्रकाराचा पोलीस तपास सुरू आहे.