Albatya Galbatya Film: “किती गं बाई मी हुश्शार…”; रुपेरी पडद्यावर येणार 'अलबत्या गलबत्या' चित्रपट, थ्रीडीमध्ये बच्चेकंपनीला घेता येणार अनुभव

Albatya Galbatya Film Announcement

नाटककार रत्नाकर मतकरी यांचं "अलबत्या गलबत्या" हे गाजलेलं बालनाट्य आता थ्रीडीमध्ये प्रेक्षकांना रुपेरी पडद्यावर पाहता येणार आहे. हे बालनाट्य ७०च्या दशकातील आहे. या नाटकाने रंगभूमीवर चाहत्यांचे निखळ मनोरंजन केले आहे. या नाटकामध्ये असलेल्या चिंची चेटकिणीचे पात्र ज्येष्ठ अभिनेते दिलीप प्रभावळकर यांनी साकारले होते.

त्यानंतर काही वर्षांनंतर पुन्हा एकदा नव्या रुपात नाटक प्रेक्षकांच्या भेटीला आले होते. त्यावेळी झी प्रस्तुत आणि चिन्मय मांडलेकर दिग्दर्शित ‘अलबत्या गलबत्या’ नाटकात अभिनेता वैभव मांगलेने चिंची चेटकिणीचे पात्र साकारले होते.

आता त्या नाटकानंतर प्रेक्षकांच्या भेटीला चित्रपट येणार आहे. रंगभूमीवर धुमाकूळ घातल्यानंतर "अलबत्या गलबत्या" हा चित्रपट थ्रीडी अंदाजामध्ये प्रेक्षकांचे मनोरंजन करणार आहे.

लेखक दिग्दर्शक वरूण नार्वेकर यांनी या नाटकाचा चित्रपट करण्याची जबाबदारी घेतली आहे. अभिनेता वैभव मांगले या चित्रपटामध्ये प्रमुख भूमिका साकारणार आहे. हा चित्रपट पुढच्या वर्षी अर्थात १ मे २०२५ ला प्रदर्शित होणार आहे.

नुकतंच निर्मात्यांकडून चित्रपटाची घोषणा करण्यात आलेली आहे. "अलबत्या गलबत्या" या नाटकाचा आता चित्रपट होणार असल्यामुळे चाहते चित्रपटाबद्दल कमालीचे उत्सुक आहेत. चित्रपटामध्ये, अभिनेता वैभव मांगलेने चिंची चेटकिणीचे पात्र साकारले आहे.

तो या टीझरमध्ये, “किती गं बाई मी हुश्शार… किती गं बाई मी हुश्शार” असं म्हणताना तो दिसतोय. नाटकांतही, अभिनेता वैभव मांगलेने चिंची चेटकिणीचे पात्र साकारले होते.

नाटकानंतर चित्रपटासाठी चाहते प्रचंड उत्सुक आहेत. चित्रपटाला अत्याधुनिक व्हिएफक्सचीही जोड दिली जाणार आहे. थ्रीडी स्वरुपात हा चित्रपट असल्यामुळे बच्चेकंपनीला या चित्रपटाचा एक वेगळाच अनुभव घेता येणार आहे. "अलबत्या गलबत्या" चित्रपटाची निर्मिती एव्हरेस्ट एंटरटेन्मेंटचे संजय छाब्रिया, उदाहरणार्थ निर्मितचे सुधीर कोलते आणि न्यूक्लिअर ॲरोचे ओंकार सुषमा माने करत आहेत. रत्नाकर मतकरी यांनी कथा, कादंबरी, नाटक असे विविध साहित्यप्रकार हाताळले. त्यांची अनेक नाटकं मराठी प्रायोगिक, व्यावसायिक रंगभूमीवर गाजली.