बहुचर्चित आणि बहुप्रतिक्षित ‘ॲनिमल’ची सध्या सोशल मीडियावर प्रचंड चर्चा होत आहे. अनेकदा प्रदर्शनाच्या तारखेत बदल झाल्यानंतर अखेर प्रदर्शनाची तारीख जाहीर झाली आहे. हा चित्रपट येत्या १ डिसेंबर रोजी प्रदर्शित होणार आहे. गेल्या काही दिवसांपूर्वी रणबीर कपूरचा ‘ॲनिमल’मधील एक लूक प्रदर्शित झाला होता. त्यानंतर आता चित्रपटातील काही पात्रांचे लूक प्रेक्षकांच्या भेटीला आले आहेत. सोशल मीडियावर अभिनेत्री रश्मिका मंदान्ना आणि अभिनेते अनिल कपूर यांचा लूक समोर आला आहे. दोघांचाही लूक सध्या सोशल मीडियावर प्रचंड चर्चेत आहे.
अनिल कपूर आणि रश्मिका मंदान्नाचा लूक चित्रपटाच्या अधिकृत इन्स्टाग्राम हँडलवरून शेअर करण्यात आला आहे. दरम्यान अनिल कपूर यांच्या लूकबद्दल बोलायचे तर, ते चित्रपटामध्ये बलबीर सिंग नावाचे पात्र साकारणार आहेत. शेअर केलेल्या पोस्टमध्ये बलबीरचा हा रुग्णालयातील लूक दिसून येत आहे. हातात सलाईन, अंगावर बँडेज आणि नजरेत असलेला राग प्रेक्षकांचे लक्ष वेधत आहे. अनिल कपूरचा लूक शेअर करताना, “अ‍ॅनिमल का बाप... बलबीर सिंह!” अशा आशयाचे कॅप्शन दिले आहे.
रश्मिकाच्याही लूकची सध्या सोशल मीडियावर प्रचंड चर्चा होत आहे. रश्मिका चित्रपटामध्ये गीतांजली नावाचे पात्र साकारणार आहे. तिचा फर्स्ट लूक सोशल मीडियावर प्रदर्शित झाला आहे. अभिनेत्रीच्या लूकबद्दल सांगायचे तर, तिने हलका मेकअप, लाल पांढरी साडी परिधान केली आहे. चित्रपटाच्या लूकविषयी सांगताना अभिनेत्रीने ‘गीतांजलीच्या भूमिकेत रश्मिका मंदान्ना!’ म्हणत तिने फोटो शेअर केला आहे.
येत्या २८ सप्टेंबरला अर्थात अभिनेता रणबीर कपूरच्या वाढदिवशी चित्रपटाचा टीझर प्रेक्षकांच्या भेटीला येणार आहे. रणबीर कपूरसोबत चित्रपटामध्ये मुख्य भूमिकेत नॅशनल क्रश रश्मिका मंदान्ना, बॉबी देओल, अनिल कपूर आणि तृप्ती डिमरी हे कलाकार दिसणार आहेत. तर चित्रपटाचे दिग्दर्शन संदीप रेड्डी वांगा करणार आहेत. १८ सप्टेंबरला रणबीरचा चित्रपटातला पहिला लूक प्रदर्शित करण्यात आला होता. रावडी लूक, डोळ्याला गॉगल, तोंडात सिगारेट अन् बॉसी लूकने प्रेक्षकांचे लक्ष वेधले होते.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.