खरे 'ही मॅन', ते कायम आठवणीत राहतील; धर्मेंद्र यांच्या निधनानंर सचिन पिळगावकरांची भावनिक पोस्ट

बॉलिवूडचे लोकप्रिय अभिनेते धर्मेंद्र यांचं वयाच्या ८९ व्या वर्षी निधन झालं. गेल्या काही दिवसांपासून धर्मेंद्र यांची प्रकृती चिंताजनक होती. धर्मेंद्र यांच्या निधनाने सिनेसृष्टीत शोककळा पसरली आहे. ६ दशकं सिनेसृष्टीवर राज्य करणारा तारा निखळल्याने बॉलिवूडमधील दिग्गज कलाकारांनी त्यांना श्रद्धांजली वाहत आठवणींना उजाळा दिला आहे. ज्येष्ठ अभिनेते सचिन पिळगावकर यांनीही भावनिक पोस्ट करत धर्मेंद्र यांना श्रद्धांजली वाहिली आहे.

धर्मेंद्र यांच्यावर ब्रीच कँडी रुग्णालयात उपचार सुरु होते. त्यांना काही दिवसांपासून श्वसनाशी संबंधित त्रास जाणवत होता. रुग्णालयात डॉक्टरांच्या उपचारानंतर त्यांच्या प्रकृतीत सुधारणा झाली होती. त्यांना डिस्चार्जही मिळाला होता. आज त्यांची प्रकृती अचानक खालावली. त्यानंतर धर्मेंद्र यांनी आज सकाळी अखेरचा श्वास घेतला. त्यांच्या निधनानंतर सचिन पिळगावकर यांनी श्रद्धांजली वाहत जुन्या आठवणींना उजाळा दिला.

सचिन पिळगावकर म्हणाले, 'धर्मेंद्र आपल्याला सोडून गेलेत. त्यांची सिनेसृष्टीतील कारकीर्द नेहमी एका उंचीवरच राहील. मी भाग्यवान आहे की, मला त्यांच्यासोबत काम करण्याची संधी मिळाली. यासाठी मी मनापासून कृतज्ञ आहे. खरे 'ही मॅन' यांच्या आठवणी आपल्या हृदयात सदैव जिवंत राहतील. ॐ शांती."

तडफदार नायक हरपला; शरद पवारांनी वाहिली धर्मेंद्र यांना श्रद्धांजली

शरद पवार म्हणाले, '१९६० च्या दशकात भारतीय सिनेसृष्टीत पदार्पण करून चित्रपटात सर्वसामान्य माणसांचं प्रतिनिधित्व करणाऱ्या कथानकांमधून उठावदार भूमिका साकारणारे आणि भारतीय प्रेक्षकांची मनं जिंकून सिनेजगतात आपली स्वतंत्र ओळख निर्माण करणाऱ्या ज्येष्ठ अभिनेते धर्मेंद्र देओल यांची मृत्यूशी झुंज अखेर अपयशी ठरली. आताच्या तरुणाईला कल्पना नसेल पण एक पिढी त्यांच्या लकबीची, त्यांच्या केशभूषेची, वेशभूषेची चाहती होती. 'शोले'मध्ये त्यांनी साकारलेला 'वीरू' आजही घनिष्ठ मैत्रीचं प्रतीक आणि तडफदार नायक म्हणून भारतीय रसिकमनांवर अधिराज्य गाजवतो आहे'.