Aai Kuthe Kay Karte : अरुंधतीनंतर आता वीणाही अन्याच्या कानाखाली वाजवणार; अनिरुद्धचं आता सर्वच पितळ उघड पडणार

Aai Kuthe Kay Karte Latest Promo : टीआरपीमध्ये अव्वल ठरलेल्या ‘आई कुठे काय करते’ या मालिकेची सध्या सोशल मीडियावर तुफान चर्चा असते. मालिकेत रोजच प्रेक्षकांना नव- नवीन ड्रामा पाहायला मिळत आहे. मालिका सध्या खूप रंजक वळणावर येऊन पोहोचली आहे.

मालिकेत सध्या नितीन आणि आशुतोषमध्ये तणाव असल्याचे दिसत आहे. येत्या भागात अरुंधतीनंतर वीणाही अनिरुद्धच्या कानाखाली मारताना दिसणार आहे.त्यामुळे प्रेक्षकांना उत्सुकता वाढली आहे.

'आई कुठे काय करते' (Aai Kuthe Kay Karte)मालिकेचा नवीन प्रोमो प्रदर्शित झाला आहे. या प्रोमोत एक वेगळाच ट्वीस्ट पाहायला मिळत आहे. प्रोमोच्या सुरवातीला सर्वजण देशमुखांच्या घरी असल्याचे दिसत आहे. वीणा आणि आशुतोष घराबाहेर असतात. त्यावेळी अनिरुद्ध जोरात ओरडून म्हणतो, 'मग खुशाल कोर्टात जा. पण या धसक्याने जर माझ्या आईवडिलांना काही झाले तर सर्वस्वी तुम्ही आणि ही अरुंधती जबाबदार असेल.'

त्यावर अरुंधती (Arundhati) म्हणते, 'तुमचा अहंकार तुमच्या सदसद्विवेकबुद्धीवर स्वार झाला आहे अनिरुद्ध'. यावर अनिरुद्ध उलट अरुंधतीला म्हणतो, 'तू मला शहाणपणा शिकवू नको'. यानंतर कांचन आजी पुढे येऊन वीणाची माफी मागते. 'वीणा माझ्या मुलाला माफ कर गं. मी पदर पसरते तूझ्यासमोर.' अशी विनंती कांचन आजी वीणाला करतात.

मागील भागात नितीनच्या कपाटात वीणाचा हरवलेला फोन (Phone) सापडतो.हा फोन अनिरुद्धनेच नितीनच्या कपाटात ठेवलेला असतो. फोन सापडल्यावर अनिरुद्धने नितीन वीणाला त्रास देत असल्याचे आरोप नितीनवर लावले होते. या आरोपानंतर मात्र आशुतोषनेही नितीनवर अविश्वास दाखवला. आशुतोषने नितीनच्या कानाखालीदेखील मारली. त्यामुळे अरुंधती आणि आशुतोषमध्येही गैरसमज झाले आहेत.

या सर्व गोष्टी झाल्यावर नितीनही कंपनीतून राजीनामा देतो. एकीकडे सर्वजण नितीनवर अविश्वास दाखवत असतात तर दुसरीकडे संजना आणि यशला अनिरुद्धच्या विरोधात पुरावे सापडतात. त्यानंतर अरुंधती, संजना आणि यश अनिरुद्धनेच हे सर्व घडवून आणल्याचे सत्य सर्वांसमोर उगडकीस आणतात. यामुळे नितीनवर केलेले आरोप आता खोटे ठरले आहेत.

मालिकेच्या आजच्या भागात वीणा अनिरुद्धच्या कानाखाली मारताना दिसणार आहे. त्यामुळे प्रेक्षकांना नवीन भागाची आतुरता आहे. अनिरुद्धचं सत्य उघड झाल्यावर वीणा अनिरुद्धला माफ करणार का? हा सर्व प्रकार उघडकीस आल्यावर वीणाच्या भूतकाळातील गोष्टी समोर येणार का? वीणाचा नवरा मालिकेत एन्ट्री करणार का ? असे प्रश्न प्रेक्षकांमध्ये उपस्थित झाले आहे.