Ulhasnagar Crime: उल्हासनगरात प्रेमसंबंधाच्या वादातून तरुणावर हल्ला; लोखंडी कड्याने मारहाण, घटना सीसीटीव्हीमध्ये कैद

प्रेयसीच्या भावाला चुगली केल्याच्या रागातून प्रियकर मित्राने मित्राला कड्याने बेदम मारहाण केल्याची घटना उल्हासनगरच्या सपना गार्डन शेजारी घडली. घटनेला १५ दिवस उलटूनही पोलीसांनी आरोपी विरोधात कारवाई केली नसल्याचा फिर्यादीचा आरोप आहे. ही घटना सिसिटीव्हीमध्ये कैद झाली आहे.

पवन खटीजा आणि रौनक शर्मा हे दोघेही महाविद्यालयीन मित्र आहेत. त्यांच्या ग्रुपमध्ये रौनकच्या प्रेयसीचा भाऊ देखील आहे. त्याला कोणीतरी रौनक आणि त्याच्या बहिणीच्या मैत्रीबाबत सांगितले. रौनक हा टपोरी असल्याने त्याने बहिणीला रौनकशी मैत्री तोडण्यास सांगितले. त्यामुळे प्रेयसीने रौनकशी बोलणे बंद केले.

ही चुगली पवनने केली असल्याच्या संशयातून रौनकने त्याला ६ डिसेंबरच्या रात्री सपना गार्डन येथे गाठून हातातील कड्याने बेदम मारहाण करीत चोप दिला. ह्या घटनेला १५ दिवस उलटूनही पोलीसांनी रौनक शर्मा विरोधात कडक कारवाई केली नसल्याचा आरोप पवन खटिजा याने केला आहे.

पवन म्हणाला की, ६ डिसेंबरच्या रात्री त्याच्यावर जीवघेणा हल्ला केला. त्याचे नाव रौनक असे आहे. तो म्हणाला रौनक हा त्याचा कॉलेजचाच मित्र आहे. कॉलेजमध्ये तो आमचा मित्र होता. तो एका मुलीशी बोलायचा आणि त्या मुलीचा भाऊ देखील आमच्या ग्रुपमध्येच होता. तिच्या भावाला बाहेरुन कुठूनतरी कळाले की मी त्याच्या बहिणीसोबत बोलतो तर त्याने तिच्या बहिणीला थांबवले बोलला की हा टपोरी मुलगा आहे त्याच्याशी बोलू नकोस. असे करुन रौनकच्या मनात राग होता की या ४-५ मुलांना मारायचं आहे. त्यानी मला सपना गार्डनकडे बोलावून मारायला सुरुवात केली. ही घटना सिसिटीव्हीमध्ये कैद झाली आहे.