Shocking : संतापजनक! विद्यार्थ्याला शाळेच्या खिडकीला उलटं लटकवलं अन्..., धक्कादायक घटना कॅमेऱ्यात कैद

"छडी लागे छम छम, विद्या येई घम घम" ही कविता आपण लहानपणापासून ऐकत आलो आहोत मात्र या छडीचा अतिरेक झाला तर काय घडू शकतं याचे जीवंत उदाहरण हरियाणात पाहायला मिळालं आहे. शहरातील एका खाजगी शाळेत गृहपाठ पूर्ण केला नाही, म्हणून स्कुल व्हॅन चालकाने सात वर्षांच्या विद्यार्थ्याला खिडकीला बांधून उलटं लटकवल्याची संतप्त घटना घडली आहे. या घटनेनंतर पालकांनी पोलीस ठाण्यात व्हॅन चालकाविरोधात गुन्हा दाखल केला आहे.

मिळालेल्या माहितीनुसार हरियाणातील पानिपतमध्ये विराट नगर येथील सृजन पब्लिक स्कूलमध्ये एक विद्यार्थी इयत्ता दुसरीत शिकत होता. शाळेतील शिक्षकांनी त्याला गृहपाठ करण्यास अनेकदा बजावले मात्र त्याने गृहपाठ केला नाही. स्कुल व्हॅन चालकाला हे समजताच त्याने पीडित विद्यार्थ्याला कानाखाली मारली. तसेच त्याचे पाय दोरीने बांधले आणि शाळेच्या खिडकीला उलटं लटकवले.

ही घटना १३ ऑगस्ट रोजी घडली असून शनिवारी या घटनेचा व्हिडिओ संबंधित विद्यार्थ्याच्या पालकांच्या हाती लागला आहे. व्हॅन चालकाने विद्यार्थ्याला उलटं लटकवण्याचा आणि मारहाण करण्याचा व्हिडिओ पीडित मुलाच्या इतर मित्रांना दाखवून घाबरवण्याचा प्रयत्न देखील केला. पीडित विद्यार्थ्याच्या पालकांनी तात्काळ शाळेच्या मुख्याध्यापकांशी संपर्क साधला आणि मॉडेल टाउन पोलिसांकडे तक्रार दाखल केली. पोलिसांनी व्हॅन चालक अजयविरुद्ध गुन्हा दाखल केला आहे आणि तपास सुरू केला आहे.

जेव्हा पीडित मुलाच्या कुटुंबीयांनी शाळेच्या मुख्याध्यापकांना या घटनेबद्दल जाब विचारला तेव्हा त्यांनी सांगितले, त्यांना या व्हिडिओबद्दल काहीही माहिती नाही. तथापि, पीडित मुलाने त्याच्या आईला सांगितले की, अजय काकांनी त्याला खिडकीतून लटकवले, त्याआधी त्याला कानाखाली मारण्यात आली आणि घटनेचा व्हिडिओ रेकॉर्ड करून सोशल मीडियावर अपलोड केला.

पोलिसांनी आरोपी स्कुल व्हॅन चालक अजयविरुद्ध बालगुन्हेगारी कायद्यांतर्गत गुन्हा दाखल केला आहे. पीडित विद्यार्थ्याच्या आईने सांगितले की, अजय वारंवार मुलांशी अनुचित वर्तन करत असे आणि काही पालकांनी त्याच्या वर्तनाबद्दल तक्रार केली होती. अनेक तक्रारींनंतर अजयला काही दिवसांपूर्वी नोकरीवरून काढून टाकण्यात आले आहे. पोलीस या घटनेचा खोल तपास करत आहेत.