Shocking : भयंकर! बहिणीच्या लिव्ह-इन पार्टनरने साधली संधी; धाकट्या बहिणीवर अत्याचार करून काढला पळ

राजस्थानमधील सीकर जिल्ह्यात धक्कादायक घटना उघडकीस आली आहे. मोठ्या बहिणीच्या लिव्ह-इन पार्टनरने तिच्या अवघ्या १४ वर्षांच्या धाकट्या बहिणीवर बलात्कार केल्याची घटना घडली. या घटनेनंतर पीडितेच्या आईने पोलिस ठाण्यात तक्रार दाखल केली असून, पोलिसांनी तात्काळ कारवाई करत आरोपीविरोधात पॉक्सो कायद्यांतर्गत गुन्हा नोंदवला आहे. या प्रकरणामुळे परिसरात मोठी खळबळ उडाली आहे.

मिळालेल्या माहितीनुसार, पीडित मुलीची मोठी बहीण काही वर्षांपूर्वी घर सोडून एका तरुणासोबत लिव्ह-इन रिलेशनशिपमध्ये राहत होती. कुटुंबाच्या म्हणण्यानुसार, याच तरुणाने संधी साधून घरात ये-जा करत मुलीला विश्वासात घेऊन तिला फसवलं आणि तिच्यावर बलात्कार केल्याचा आरोप आहे. ही घटना घडल्यानंतर मुलगी अत्यंत घाबरली होती. काही काळ तिने हा प्रकार लपवून ठेवला, मात्र नंतर तिने घडलेला प्रकार आपल्या कुटुंबीयांना सांगितला.

घटनेची माहिती मिळताच कुटुंबीयांनी मोठ्या मुलीशी संपर्क साधून तिला याबाबत सांगितले. मात्र, आरोपानुसार मोठ्या मुलीने आणि तिच्या लिव्ह-इन पार्टनरने कुटुंबावर दबाव टाकत ही बाब बाहेर येऊ नये, यासाठी धमक्या दिल्या. तरीही, पीडितेच्या आईने कोणत्याही दबावाला न जुमानता पुढे येत पोलिसांची मदत घेतली. तिच्या या निर्णयामुळे प्रकरण उघडकीस आले.

पोलिसांनी या प्रकरणाचे गांभीर्य लक्षात घेऊन अल्पवयीन पीडितेची वैद्यकीय तपासणी केली असून तिचा जबाब नोंदवला आहे. तसेच, पॉक्सो कायद्यांतर्गत विविध कलमांखाली गुन्हा दाखल करून पुढील तपास सुरू करण्यात आला आहे. दरम्यान, आरोपी तरुण सध्या फरार असून त्याचा शोध घेण्यासाठी पोलिसांनी विशेष पथकांची नियुक्ती केली आहे. आरोपीला लवकरच अटक करण्यात येईल, असा विश्वास पोलिसांनी व्यक्त केला आहे.