Pune Cyber Crime: CBI चौकशीची भिती दाखवून डॉक्टरला घातला ३० लाखांचा गंडा; पुण्यातील धक्कादायक घटना!

अक्षय बडवे, पुणे|ता. १६ एप्रिल २०२४

सीबीआयकडून मनी लॉन्ड्रिंगची चौकशी करण्यात येणार असल्याच्या बहाण्याने सायबर चोरट्यांनी डॉक्टरची फसवणूक केल्याची घटना पुण्यामध्ये घडली आहे. या प्रकरणी एका ६७ वर्षीय डॉक्टरने वारजे पोलिस ठाण्यात फिर्याद दिली आहे.

पुणे शहरात एकीकडे गुन्हेगारी घटनांनी कळस गाठलेला असताना ऑनलाईन फसवणूकीचे प्रकारही समोर येत आहेत. पुण्यातील कर्वेनगर भागातील एका डॉक्टरची सायबर चोरट्यांकडून तब्बल ३० लाख ५७ हजार रुपयांची फसवणूक झाल्याची घटना समोर आली आहे. या प्रकरणी एका ६७ वर्षीय डॉक्टरने वारजे पोलिस ठाण्यात फिर्याद दिली आहे.

या तक्रारीत दिलेल्या माहितीनुसार, सायबर चोरट्यांनी पीडित डॉक्टरांच्या फोनवर फोन करत त्यांच्या मुंबईहून प्रदीप शर्मा बोलत असल्याचे सांगितले. मनी लॉन्ड्रिंगच्या व्यवहारात सीबीआयकडून तुमची चौकशी करण्यात येत असल्याची त्यांना धमकी दिली. चोरट्यांनी डॉक्टरकडे आधारकार्ड, बँक खातेची माहिती मागितली.

तसेच, बँक खात्याचा तपास करण्यासाठी ऑनलाइन पैसे पाठविण्यास सांगितले. त्यानंतर सायबर चोरट्यांनी त्यांना धमकावून वेळोवेळी ३० लाख ५७ हजार रुपये घेतले. फसवणूक झाल्याचे लक्षात आल्यानंतर त्यांनी पोलिस ठाण्यात तक्रार दिली. वारजे पोलीस या प्रकरणाचा अधिक तपास करत आहेत. या घटनेने शहरात एकच खळबळ उडाली आहे.