Bhiwandi Crime: भिवंडीत घुसखोर बांगलादेशींविरोधात मोठी कारवाई, ९ महिलांना अटक

पोलिस प्रशासनाने बांगलादेशी नागरिकांविरुद्ध मोठ्या प्रमाणावर शोधमोहीम सुरू केली आहे. भिवंडी पोलिस उपायुक्त कार्यक्षेत्रात गेल्या दोन महिन्यांत ३० हून अधिक बांगलादेशी नागरिकांची धरपकड करण्यात आली आहे. यामध्ये भिवंडी गुन्हे शाखेने आणखी एक मोठी कारवाई केली आहे. ठाकूरपाडा येथील एका चाळीत तर एकूण नऊ बांगलादेशी महिलांना अटक करण्यात आली आहे. यासोबतच त्यांना आसरा देणाऱ्या चाळीच्या मालकाविरुद्ध गुन्हा दाखल केला आहे.

भिवंडी गुन्हे शाखेचे वरिष्ठ पोलीस निरीक्षक जनार्दन सोनवणे यांना गुप्त बातमीदारांच्या माध्यमातून माहिती मिळाली होती की, ठाकूरपाडा येथील एका चाळीत बांगलादेशी नागरिक आपली ओळख लपवून वास्तव्य करत आहेत. त्यानुसार, पोलिसांनी त्या ठिकाणी कारवाई केली. ठाकूरपाडा येथील नविन मराठी शाळेच्या पाठीमागे दिपक गंगाराम ठाकरे यांच्या चाळीत बांगलादेशी नागरिक सापडले.

नऊ महिलांना अटक, चाळ मालकावर गुन्हा

भिवंडी गुन्हे शाखेच्या पथकाने कारवाई करून नऊ बांगलादेशी महिलांना पकडले. त्यात सिमा बेगम सिराज बेग (वय २७), रेखा अनिसराम राम, रूपा अनिसराम राम उर्फ सती इक्बाल इक्चाल हुसैन अक्तर (वय २४), अंजनी हबीज शा (वय २३), शारदा बन्सी साहू (वय ४२), ममता शारदा साहू (वय २६), पायल राजु साहू (वय २८), पिंकी शारदा साहू (वय ४५) आणि काजल शांत्रवन्सी साहू (वय २०) या महिलांचा समावेश आहे. या महिलांनी कोणत्याही अधिकृत कागदपत्रांशिवाय भारताच्या सीमेत प्रवेश केला आणि भिवंडीमध्ये राहण्यास सुरवात केली.

या महिलांच्या बांगलादेशी नागरिकतेचे प्रमाण सापडल्याने त्यांच्यावर स्थानिक पोलिस ठाण्यात गुन्हा दाखल करण्यात आला. यासोबतच चाळीचे मालक दिपक गंगाराम ठाकरे याच्याविरोधातही कोनगाव पोलिस ठाण्यात गुन्हा नोंदवून त्याला अटक केली आहे. या सर्व कारवायांमुळे भिवंडी पोलिसांनी बांगलादेशी नागरिकांविरुद्ध कडक कारवाई सुरू ठेवली आहे.