Nashik Crime: जुन्या वादातून भयंकर घडलं.. भरदिवसा तरुणाची निर्घृण हत्या; नाशिक शहर हादरलं

तबरेज शेख, प्रतिनिधी

Nashik Crime News:

नाशिक शहरातील वाढती गुन्हेगारी दिवसेंदिवस चिंतेचा विषय ठरत आहे. नाशिकमध्ये खुन, दरोडे, मारामाऱ्या असे गंभीर प्रकार वारंवार घडत असल्याने नागरिकांमध्ये भितीचे वातावरण पसरले असून आज ( शुक्रवार १३,ऑक्टोंबर) भरदिवसा झालेल्या आणखी एका हत्येने शहरात एकच खळबळ उडाली आहे.

याबाबत सविस्तर माहिती अशी की, नाशिकच्या (Nashik) पंचवटी परिसरात अठ्ठावीस वर्षीय तरुणाची त्याच्या मित्रांनीच निर्घृण हत्या केल्याची घटना समोर आली आहे. सागर विष्णू शिंदे (वय 28) असे हत्या झालेल्या तरुणाचे नाव असून पंचवटी परिसरातील कुसुमाग्रज उद्यान जवळ ही भयंकर घटना घडली.

प्राथमिक माहितीनुसार, पंचवटी परिसरातील कुसुमाग्रज उद्यानजवळ हे चारही मित्र मद्यपान करायला बसले होते. यावेळी मद्यपानादरम्यान जुन्या वादातून एका तरुणाने सागर शिंदे याच्यावर हल्ला चढवला. या हल्ल्यामध्ये पोटावर आणि डोक्यावर वार झाल्याने सागर शिंदे याचा जागीच मृत्यू झाला.

घटनेची माहिती मिळताच पंचवटी पोलिसांनी तात्काळ धाव घेत मृतदेह ताब्यात घेतला. भरदिवसा झालेल्या या घटनेने संपूर्ण शहरात एकच खळबळ उडाली आहे. पंचवटी पोलीस या प्रकरणाचा पुढील तपास करत आहेत. (Latest Marathi News)