Nagpur Crime : नागपुरच्या कारागृहात कैद्यांमध्ये राडा, पाणी भरण्यावरून वाद; पुण्याच्या गँगस्टरकडून जीवघेणा हल्ला

पुण्यातील कुख्यात गँगस्टर प्रवीण महाजनचा नवा कारनामा समोर आला आहे. नागपूर मध्यवर्ती कारागृहात एका किरकोळ वादातून त्याने दुसऱ्या कैद्यावर जीवघेणा हल्ला केल्याची धक्कादायक घटना उघडकीस आली आहे. या घटनेने तुरुंगात भीतीचे वातावरण निर्माण झाले आहे.

मिळालेल्या माहितीनुसार, कारागृहात पाणी भरण्याच्या वादावरून प्रवीण महाजनने तौसीफ इब्राहिम या कैद्यावर हल्ला चढवला. या हल्ल्यात तौसीफ जखमी झाला असून त्याला तातडीने उपचारासाठी शासकीय रुग्णालयात हलविण्यात आले.

या प्रकरणाची माहिती मिळताच तुरुंग हवालदार अमोल ईखनकर यांनी तक्रार दाखल केली. त्यांच्या तक्रारीवरून धंतोली पोलिसांनी प्रवीण महाजनविरोधात मारहाणीचा गुन्हा नोंदवला आहे. पोलिस अधिक तपास करत असून कैद्यांमधील तणावाचे मूळ कारण शोधण्याचा प्रयत्न सुरू आहे.

प्रवीण महाजन हा पुण्यातील कुख्यात गँगस्टर असून ५ मे २०२१ रोजी त्याने बुधवार पेठ परिसरात फरासखाना पोलिस ठाण्यातील कॉन्स्टेबल समीर सय्यद याची हत्या केली होती. या प्रकरणानंतर प्रवीणला बेड्या ठोकण्यात आल्या. सुरक्षेच्या दृष्टीने त्याला पुण्यातील येरवडा कारागृहात ठेवणे धोकादायक असल्याने त्याला नागपूर मध्यवर्ती कारागृहात हलविण्यात आले.

तथापि, अत्यंत सुरक्षित म्हणून ओळखल्या जाणाऱ्या नागपूर कारागृहात प्रवीण महाजनने पुन्हा हिंसक वर्तन करणे ही गंभीर बाब मानली जात आहे. यामुळे कारागृहातील सुरक्षेची पातळी आणि प्रशासनाच्या निष्काळजीपणाबद्दल चर्चा सुरू झाली आहे. कैद्यांवर लक्ष ठेवण्यासाठी असलेली यंत्रणा योग्यरीत्या काम करत आहे का, हा प्रश्न उपस्थित झाला आहे.