Shocking : फार्मसीच्या १९ वर्षीय विद्यार्थ्याची आत्महत्या, धक्कादायक कारण उघड

संजय महाजन, जळगाव

जळगावमधून शिक्षण क्षेत्रात खळबळ उडवणारी घटना समोर आली आहे. जिल्ह्यातील एका नामांकित कॉलेजच्या फार्मसीच्या द्वितीय वर्षात शिकणाऱ्या विद्यार्थ्याने आत्महत्या केल्याचे समोर आले आहे. विद्यार्थ्याने आत्महत्येपूर्वी लिहिलेल्या सुसाईड नोटमध्ये कॉलेजच्या प्राचार्यावर आरोप करण्यात आले आहे. त्यामुळे संबंधित प्राचार्याच्या छळाला कंटाळून विद्यार्थ्याने आत्महत्या केली असल्याचा प्राथमिक अंदाज आहे. याप्रकरणी पोलीस ठाण्यात प्राचार्य योगेश पवार यांच्यावर गुन्हा दाखल करण्यात आला आहे. तसेच पोलीस पुढील सखोल तपास करत आहेत.

मिळालेल्या माहितीनुसार, श्याम प्रभाकर पाटील असे आत्महत्या करणाऱ्या १९ वर्षीय विद्यार्थ्यांचे नाव आहे. श्याम पाटील हा जळगावातील गुलाबराव देवकर कॉलेज ऑफ फार्मसीच्या द्वितीय वर्षात शिकत होता. या कॉलेजमधील प्राचार्य योगेश पवार यांनी काही दिवसांपूर्वी मित्रांच्या भांडणात मध्यस्थी करण्यासाठी गेलेल्या श्यामला पीव्हीसी पाईपने सर्व शिक्षक आणि विद्यार्थ्यांसमोर बेदम मारहाण केली.

महाविद्यालयाच्या प्राचार्यांनी सर्वांसमोर केलेल्या मारहाणीमुळे अपमानित वाटल्याने श्यामने टोकाचे पाऊल उचलत गळफास घेत आत्महत्या केली. याबद्दल विद्यार्थ्याने आत्महत्येपूर्वी सुसाईड नोटमध्ये नमूद केले होते. तसेच "माझी स्टोरी इन्स्टावर टाक जो," अशी शेवटची विनंती देखील त्याने आपल्या मित्राला केल्याचे सुसाईड नोट मध्ये लिहिले होते. श्यामच्या खिशात सापडलेल्या 'सुसाईड नोट' वरून रामानंदनगर पोलीस ठाण्यात आत्महत्येस प्रवृत्त केल्याप्रकरणी प्राचार्य योगेश पवार यांच्यावर गुन्हा दाखल करण्यात आला आहे.

पोलीस सध्या या प्रकरणाचा अधिक तपास करत असून सीसीटीव्ही फुटेज आणि इतर विद्यार्थ्यांचे जबाब नोंदवण्याचे काम सुरू असल्याची माहिती मिळाली आहे. प्राचार्यांनी केलेल्या मारहाणीमुळे तणावत असल्याने तरुणाने आत्महत्या केल्याची प्रतिक्रिया देखील पोलीस अधिकाऱ्यांनी दिली आहे. दरम्यान आता या प्रकरणी प्राचार्याला काय शिक्षा मिळणार हे पाहणं महत्त्वाचं ठरेल.