Crime News: संरक्षण भिंतीवरुन विद्यार्थिनींच्या हॉस्टेलमध्ये घुसला, नशेत फुल्ल असताना नराधमाकडून मुलींची छेड; दारुड्याला बेदम चोप

जालना: जालन्यातील परतूर येथील कस्तुरबा गांधी बालिका वसतीगृहात घडलेल्या एका धक्कादायक घटनेत, मुलींची छेड काढणाऱ्या दारुड्याला विद्यार्थिनींनी आणि सुरक्षारक्षकाने चांगलाच चोप दिला. ही घटना काल रात्री आठ वाजण्याच्या सुमारास घडली असून संपूर्ण प्रकरण सीसीटीव्हीत कैद झाले आहे.

संशयित आरोपीने संरक्षण भिंतीवर चढून वस्तीगृहात प्रवेश केला आणि विद्यार्थिनींना त्रास देण्याचा प्रयत्न केला. मात्र, धाडसी विद्यार्थिनींनी आरोपीला चांगलाच चोप दिला आणि नंतर पोलिसांच्या स्वाधीन केले.

या घटनेनंतर परतूरमधील वस्तीगृहातील सुरक्षेचा प्रश्न ऐरणीवर आला आहे. विद्यार्थिनींच्या सुरक्षेसाठी अधिक प्रभावी उपाययोजना करण्याची मागणी होत आहे. या पार्श्वभूमीवर, परतूरच्या तहसीलदारांनी आज वस्तीगृहाला भेट देत सुरक्षेचा आढावा घेतला.

स्थानिक प्रशासनाने या घटनेची गंभीर दखल घेतली असून भविष्यात अशा घटना टाळण्यासाठी सुरक्षा यंत्रणा अधिक सक्षम करण्याचा निर्णय घेतला आहे.