Fraud News: मलकापूर बँकेला घातला ९ कोटींचा गंडा! भाजप पदाधिकाऱ्यासह दोघांना अटक; काय आहे प्रकरण?

रामू ढाकणे, छत्रपती संभाजीनगर|ता.२७ एप्रिल २०२४

छत्रपती संभाजीनगरमधील मलकापूर अर्बन बँकेत जमिनीची खोटे कागदपत्रे बनवून 9 कोटी रुपयांचे कर्ज लाटल्याचा धक्कादायक प्रकार समोर आला आहे. याप्रकरणी भाजपा पदाधिकारी, जिल्हा बँकेचा संचालक अभिषेक जयस्वालसह दोघांना अटक करण्यात आली आहे. आर्थिक गुन्हे शाखेने ही मोठी कारवाई केली आहे.

याबाबत सविस्तर माहिती अशी की, छत्रपती संभाजीनगर शहरातील मलकापूर अर्बन बँकेत जमिनीचे बनावट कागदपत्रे सादर करत चक्क ९ कोटी रुपये कर्ज काढण्याची घटना समोर आली आहे. याप्रकरणी अभिषेक जगदीश जयस्वाल आणि अमरीश जगदीश जयस्वाल या दोघांना आर्थिक गुन्हे शाखेने अटक केली आहे.

आरोपींपैकी अभिषेक जयस्वाल हा भाजपचा पदाधिकारी तसेच जिल्हा बँकेचा संचालक असल्याची माहिती समोर आली आहे. शहरातील समर्थ नगर मधल्या कोट्यावधीची जमीन विकत देण्यास मूळ मालकाने नकार दिल्यानंतर अभिषेक जयस्वाल यांनी त्याच जमिनीची खोटी कागदपत्रे तयार केली.

त्यानंतर रजिस्ट्री कार्यालयातील अधिकाऱ्यांच्या मदतीने बोगस खरेदी खत तयार करून मलकापूर अर्बन बँकेतून 9 कोटी रुपयांची कर्ज उचलून बँकेला चुना लावला. हे प्रकरण समोर आल्यानंतर आर्थिक गुन्हे शाखेने कारवाई करत दोघांना अटक केली आहे. या प्रकरणाचा अधिक तपास सुरू आहे.