Shocking : संक्रांतीला माहेरी गेली, शेजारच्या कुटुंबाने चेटकीण समजून जीव जाईपर्यंत मारलं; नेमकं प्रकरण काय?

बिहारची राजधानी पाटणाजवळील बिहटा येथे एका महिलेला चेटकीण असल्याच्या संशयावरून मारहाण करून तिची हत्या केल्याची धक्कादायक घटना घडली आहे. पोलिसांनी घटनास्थळी पोहोचून तपास केला आणि मृतदेह शवविच्छेदनासाठी पाठवला.या घटनेने परिसरात एकच खळबळ उडाली आहे.

मिळलेल्या माहितीनुसार, बिहटा पोलीस स्टेशन परिसरातील वाजितपूर गावात मकर संक्रांतीच्या दिवशी एक ३२ वर्षीय महिला तिच्या माहेरी आलेली. या महिलेच्या माहेरच्या शेजारील घरात एका ६ वर्षीय मुलाचा गंभीर आजाराने मृत्यू झाला. त्यानंतर मृत मुलाच्या कुटुंबीयांना महिलेवर चेटकीण असल्याचा संशय आला. बुधवारी दुपारी महिलेला एकटी पाहून मृत मुलाच्या कुटुंबीयांनी घरात घुसून तिला काठ्यांनी मारहाण केली.

गोंधळ ऐकून महिलेचे कुटुंबीय आणि शेजारी हस्तक्षेप करण्यासाठी धावले. या हाणामारीत महिलेचे वडील, आई आणि काका यांच्यासह पाच जण जखमी झाले. त्यानंतर कुटुंबातील सदस्य आणि शेजाऱ्यांनी महिलेला रुग्णालयात नेले, जिथे डॉक्टरांनी तिला मृत घोषित केले. तिच्या मृत्यूनंतर कुटुंबावर शोककळा पसरली आहे.

याप्रकरणी पोलिसांत तक्रार दाखल करण्यात आली आहे. पोलिसांनी घटनास्थळी पोहोचून तपास केला आणि मृतदेह शवविच्छेदनासाठी पाठवला. दरम्यान याप्रकरणी हाणामारी करणाऱ्या आरोपीना पोलिसांनी ताब्यात घेतलं असून पुढील तपास सुरु आहे.