Ladki Bahin Yojana : परप्रांतीय लाडकीनंही लुटलं, बोगस लॉग-ईन आयडीचे हजारो अर्ज; यूपी, आसाम, प. बंगालच्या भामट्या बहिणी

Ladki Bahin Yojana Updates : राज्यात तब्बल ३० लाख लाडक्या बहिणी नियमबाह्य असल्याची चर्चा सुरू असताना आता थेट परप्रांतीय लाडक्या बहिणींनी महाराष्ट्राच्या तिजोरीवर डल्ला मारल्याचं समोर आलंय. या योजनेतील परराज्यातल्या बोगस लाभार्थ्यांचं रॅकेट समोर आलंय. अस्पष्ट कागदपत्रं आणि आधार क्रमांकाच्या आधारे फसवणूक करण्याचा या हजारो भामट्या बहिणींचा प्रयत्न होता. याप्रकरणी सोलापूर जिल्ह्यातल्या बार्शी शहर पोलिस ठाण्यात गुन्हा दाखल झालाय. नक्की हे रॅकेट कसं कार्यरत होत ते पाहूया.

लाडकी बहीणमध्ये परप्रांतीय रॅकेट

- सांगली, लातूरमधल्या अंगणवाडी सेविका दाखवून बनवले लॉग-ईन आयडी

- अंगणवाडी सेविकांच्या बोगस आयडीवरुन 1171 अर्ज भरण्यात आले

- आधार कार्डवरचा पत्ता दिसू नये म्हणून अस्पष्ट दिसणारी कॉपी अपलोड

- एकही मुस्लीम महिला नसणाऱ्या गावातील मुस्लीम महिला लाभार्थी दाखवल्यानं भांडाफोड

- आधार क्रमांकाशी लिंक खातं यूपी, आसाम, प. बंगाल, राजस्थानमधल्या व्यक्तींचं

दरम्यान ही बनवेगीरी समोर आल्यानंतर मुख्यमंत्र्यांनी योजनेतील अनियमीततेची चौकशी करुन कारवाई करु, असं म्हटलंय. तर विरोधकांनी सत्ताधाऱ्यांवर निशाणा साधलाय. अनियमीततेची चौकशी करुन कारवाई करु असे मुख्यमंत्री देवेंद्र फडणवीस यांनी म्हटलंय. तर सरकारी एजन्सीनं उत्तर दिलं पाहिजे अशी प्रतिक्रिया खासदार सुप्रिया सुळे यांनी दिलीय.

आता अशा परप्रांतीय भामट्या बहिणींकडून वसुली करण्यात येईल, असं सोलापूरचे पालकमंत्री जयकुमार गोरे यांनी म्हटलंय. मोठा आर्थिक भार असलेल्या लाडकी बहिण योजनेचे तब्बल 2 कोटी 34 हजार लाभार्थी आहेत. आत्तापर्यंत सात हफ्ते लाडकीला मिळाले आहेत. भविष्यात योजनेत फक्त अपेक्षित गरजू लाभार्थीच राहतील आणि बाकी श्रीमंत आणि बोगस अर्ज निकाली निघतील अशी आशा करुया.