Ladki Bahin Yojana: eKYC करुनही २४ लाख लाडक्या बहि‍णींना डिसेंबरचे ₹१५०० आलेच नाहीत; कारण काय?

लाडकी बहीण योजनेच्या लाभार्थ्यांना डिसेंबरचा हप्ता तर जमा झाला आहे त्यानंतर आता महिला जानेवारीच्या हप्त्याची वाट पाहत आहे. दरम्यान, जानेवारीचा हप्ता येण्याआधीच लाडक्या बहि‍णींना मोठा फटका बसला आहे. लाडकी बहीण योजनेत लाखो महिलांना डिसेंबरचा हप्ता मिळालेला नाही. महिलांच्या खात्यात पैसे जमा झालेले नाही. त्यामुळे महिलांमध्ये नाराजी निर्माण झाली आहे.

२४ लाख महिलांचा लाभ बंद

लाडकी बहीण योजनेत महिलांना केवायसी करण्यास सांगितले होते. केवायसी करण्याची शेवटची तारीख ३१ डिसेंब २०२५ होती. त्याआधी केवायसी करणे अनिवार्य होते. दरम्यान, केवायसी न केलेल्या महिलांचा लाभ बंद करण्यात आला आहे. अशातच केवायसी करुनही २४ लाख महिलांचा लाभ बंद करण्यात आला आहे.

२४ लाख महिलांचा लाभ बंद, कारण काय? (Ladki Bahin Yojan 24 Lakh Women wont Recieve December Installment Know the Reason)

लाडकी बहीण योजनेत २४ लाख महिलांना डिसेंबरचा हप्ता मिळाला नाही. त्यामागचे मुख्य कारण म्हणजे केवायसीमध्ये झालेली चुकी. केवायसी करताना अनेक तांत्रिक अडचणी किंवा प्रश्न व्यवस्थित न समजल्याने महिलांनी चुकीची उत्तरे दिली आहे, याबाबत टाईम्स ऑफ इंडियाने वृत्त दिले आहे.

केवायसीमध्ये एक प्रश्न विचारण्यात आला होता की, तुमच्या घरातील कोणी सरकारी नोकरीत नाही ना? याचे उत्तर नाही असं यायला हवं होतं. परंतु अनेकांनी या प्रश्नाचे उत्तर हो असं लिहलं. त्यामुळे अडचणी निर्माण झाल्या आहेत. महिला पात्र नसल्याचे केवायसीत समोर आले त्यामुळे महिलांना पैसे मिळाले नाहीत. परंतु आता यावर राज्य सरकारने तोडगा काढला आहे.

अंगणवाडी सेविका करणार पडताळणी

लाडकी बहीण योजनेत केवायसीमुळे ज्या महिलांचे पैसे रखडले आहेत. त्यांची प्रत्यक्ष पडताळणी केली जाणार आहे. अंगणवाडी सेविकांद्वारे ही पडताळणी करण्याच्या सूचना जिल्हाधिकाऱ्यांना दिल्या आहेत.