Gold-Silver Price: सोन्यानंतर चांदीही चमकली; जाणून घ्या दिवसाअखेरचा सोने-चांदीचा दर

वर्ष २०२६ लागलं तरी सोने आणि चांदीच्या किमती विक्रमी वाढीला ब्रेक लागत नाहीये. बुलेट ट्रेनच्या वेगाने किमतींमध्ये वाढ होतेय. वेगाने बदलणाऱ्या आंतरराष्ट्रीय स्थितीमुळे सोने आणि चांदीच्या मागणीत वाढ होतेय. यामुळे त्यांच्या किमतीही रॉकेटच्या वेगाने वाढत आहेत. सोमवारी सोने आणि चांदीच्या किमतीत आणखी वाढ झाली आहे. या दरवाढीमुळे सोने आणि चांदीच्या दरांनी नवीन विक्रम प्रस्थापित केलाय.

चांदी पहिल्यांदाच ३ लाख रुपयांच्या पुढे

दिल्ली सराफा बाजारात चांदीचे दर प्रति किलोग्रॅम ३०२,६०० रुपयांपर्यंत वाढले, तर सोनेही प्रति १० ग्रॅम १.४८ लाखांवर पोहोचले आहे. यासह सोने आणि चांदीच्या किमती आज दिवसाअखेर पुन्हा एकदा नवीन उच्चांकावर पोहोचल्या आहेत. सोमवारी दिल्ली सराफा बाजारात चांदीच्या किमती १०,००० रुपयांनी वाढून ३,०२,६०० रुपये प्रति किलोवर पोहोचल्या आहेत. मागील आठवड्यात शुक्रवारी, दिल्ली सराफा बाजारात चांदीचे दर २,९२,६०० प्रति किलोग्रॅमवर ​​होते, त्यावेळी बाजार बंद झाला होता.

देशांतर्गत आणि जागतिक बाजारपेठेत मागणी वाढत असल्यानं चांदीच्या किमतीत मोठी वाढ झाली आहे, सराफा व्यापाऱ्यांनी सांगितले. जागतिक आर्थिक मंदीसह सोने आणि चांदीच्या मागणीत सतत वाढ होत आहे. जागतिक आर्थिक अनिश्चिततेमुळे आणि गुंतवणूकदार सुरक्षित मालमत्तेकडे अधिकाधिक वळत आहेत. त्याचमुळे सोने आणि चांदीच्या किमतींमध्ये सतत मोठी वाढ होतेय.

सोमवारी दिल्लीच्या बाजारात ९९.९ टक्के शुद्ध सोन्याचा भाव प्रति १०ग्रॅम १,९०० रुपयांनी वाढून १.४८ लाख रुपये झाला. गेल्या आठवड्यात, शुक्रवारी ९९.९ टक्के शुद्ध सोने प्रति ग्रॅम १,४६,२०० रुपयांवर ​​बंद झाले होते. या वर्षाच्या सुरुवातीला सोने आणि चांदीच्या किमतीत थोडीशी वाढ होईल असा अंदाज तज्ज्ञांनी वर्तवला होता. पण प्रत्यक्षात त्यांच्या किमती तज्ञांनी भाकीत केलेल्या अंदाजापेक्षा खूप वेगाने वाढू लागल्या आहेत.