8th Pay Commission: आठव्या वेतन आयोगात केंद्रीय कर्मचाऱ्यांचा पगार कसा वाढणार? वाचा सविस्तर

आठव्या वेतन आयोग लागू होण्याची केंद्रीय कर्मचारी वाट पाहत आहेत. दरम्यान, त्यासाठी कामदेखील सुरु केले आहे. आठव्या वेतन आयोगासाठी टर्म्स ऑफ रेफरन्सला मंजुरी दिली आहे. यानंतर १८ महिन्यात शिफारसी सादर करण्यात येतील. यानंतर पगारात आणि पेन्शनमध्ये किती वाढ होणार हे ठरवले जाईल. याचसोबत महागाई भत्त्यासह इतर भत्त्यांमध्ये काय बदल होणार याबाबत माहिती दिली जाईल.

सरकारने जानेवारी २०२४ मध्ये आठव्या वेतन आयोगाची घोषणा केली होती. दर दहा वर्षांनी आठवा वेतन आयोग लागू केला जाते. २०१६ मध्ये सातवा वेतन आयोग लागू झाला होता.त्यानंतर आता २०२६ मध्ये आठवा वेतन आयोग लागू होणार आहे.

आठव्या वेतन आयोगासाठी एक समिती स्थापन केली जाते. ही समिती सरकारच्या टर्म्स ऑफ रेफरन्सनुसार कर्मचाऱ्यांचा पगार किती वाढायला हवा, फिटमेंट फॅक्टर, पेन्शनबाबत निर्णय घेते. कर्मचाऱ्यांचे उत्पन्न, नोकरी आणि महागाई याच्या खर्चात सुसंगत राहावे, हे यामागेच उद्दिष्ट आहे. या सर्व श्रेणींमध्ये वेतन समानता राखण्याचे कामदेखील आयोग करतो.

आयोग काय काम करणार?

आठवा वेतन आयोग सध्याच्या वेतन मेट्रिक्सचा आढावा घेईल. यामध्ये वेतन, ग्रेड पे याबाबत वेगवेगळे स्थर आहेत. यानुसार फिटमेंट फॅक्टर निश्चित केला जाईल. याद्वारे नवीन पगार ठरवला जाईल. याचसोबत आयोग घरभाडे, वाहतूक भत्ता आणि वैद्यकीय भत्त्यांचादेखील आढावा घेईल. यानुसार ते पेन्शन, पगारामध्ये सुधारणा करतील.

फिटमेंट फॅक्टर किती होणार? (8th Pay Commission Fitment Factor)

सातव्या वेतन आयोगात फिटमेंट फॅक्टर २.५७ आहे. नवीन मूळ वेतन हे सहाव्या वेतन आयोगाच्या पगाराला २.५७ फिटमेंट फॅक्टरने गुणाकार करुन निश्चित करण्यात आले होते. यामध्ये मूळ वेतन दर महिन्याला १८००० निश्चित केले होते. दरम्यान, आता किमान ३.६७ पर्यंत वाढवावे. किमान वेतन २६००० ते ३९००० पर्यंत वाढवावे अशी मागणी केली जात आहे.

काही अहवालानुसार सरकार फिटमेंट फॅक्टर किमान १.८३ ते १.९२ पर्यंत ठरवू शकतो. तर कमाल अंदाज २.४६ ते २.८६ असू शकतो. याबाबत अद्याप कोणताही निर्णय घेण्यात आलेला नाही.