पावसामुळे मुंबईचं दरवर्षी वॉटर पार्क होतं, असं उपहासात्मक पद्धतीने म्हटलं जातं. मात्र आता चक्क फिश टॅंक झाला आहे, असं म्हणण्याची वेळ आली आहे. कारण मुंबई लोकल ट्रॅकवर साचलेल्या पाण्यात मासे पाहायला मिळाले आहेत. मुंबई रविवार आणि सोमवारी मुसळधार पाऊस झाला.

अतिवृष्टीमुळे रेल्वे सेवेवर मोठा परिणाम झाला. मुसळधार पावसामुळे रेल्वे रुळावर मोठ्या प्रमाणात पाणी साचलं होतं. याच साचलेल्या पाण्यात मासे पोहोतानाचा एक व्हिडिओ सोशल मीडियावर व्हायरल होत आहे. या व्हिडीओवरून नेटीझन्सनं रेल्वेची चांगलीच खिल्ली उडवलीय.

पहिल्याच पावसात रेल्वेची दाणादाण उडाली. रेल्वे ट्रॅकवर ट्रेन धावत नसल्यानं माशांनी ट्रॅकचा स्विमिंग पूलपणे आनंद घेतला, अशा प्रतिक्रिया नेटीझन्सने दिल्या आहेत. दरम्यान, हा व्हिडिओ नेमका कुठला आहे, हे अद्याप कळू शकलं नाही.

कोकण रेल्वेला पावसाचा फटका

दरम्यान, गोव्यात सुरु असलेल्या मुसळधार पावसाचा फटका कोकण रेल्वेला बसलाय. गोवा -पेरनेम येथे बोगद्यातून रूळावर मोठ्याप्रमाणात पाणी व माती आल्यामुळे रेल्वे वाहतूक ठप्प झाली आहे. गेले दोन ते तीन तासापासून कोकण रेल्वेची वाहतूक ठप्प झाली आहे.

त्यामुळे मुंबई व गोव्याच्या दिशेने जाणाऱ्या सर्वच रेल्वे गाड्या अडकून पडल्या आहेत. त्यामुळे प्रवाशांचा मोठा खोळंबा झाला आहे. सध्या कोकण रेल्वेचे वेळापत्रक कोलमडल्याने प्रवाशांकडून नाराजी व्यक्त करण्यात येतेय.