Atm Snake Incident Video: भंडारा जिल्ह्यातील मोहाडी तालुक्यातील पिंपळगाव झंजाळ या गावातील एक धक्कादायक घटना सध्या सोशल मीडियावर चांगलीच चर्चेचा विषय बनली आहे. जिथे एका बँकेच्या एटीएममध्ये एक मोठा विषारी साप सापडला असून या घटनेने संपूर्ण परिसरात भीतीचं वातावरण निर्माण झालं आहे.

पैसे भरण्यासाठी गेलेल्या कर्मचाऱ्याला धक्का

नेहमीप्रमाणे बँकेचा कर्मचारी एटीएममध्ये कॅश लोड करण्यासाठी गेला होता. यावेळी त्याने मशीन ओपन करताच त्याच्या नजरेस एक भला मोठा, काळसर रंगाचा साप (Snake) पडला. सुरुवातीला त्याला विश्वास बसला नाही की एटीएममध्ये असा साप असू शकतो, पण काही क्षणांतच साप हालचाल करू लागल्याने त्याची भीती वाढली.

तातडीने सर्पमित्राला पाचारण

सदर प्रकार लक्षात येताच बँकेच्या कर्मचाऱ्यांनी कोणतीही रिस्क न घेता तातडीने गावातील स्थानिक सर्पमित्राला संपर्क केला. सर्पमित्र घटनास्थळी पोहोचला आणि संपूर्ण खबरदारी घेत एटीएम मशीन उघडण्यात आलं. आत पाहिलं असता साप खरोखरच मशीनच्या मागच्या बाजूस गुंडाळून बसलेला होता. सर्पमित्राने अत्यंत काळजीपूर्वक त्या सापाला मशीनमधून बाहेर काढलं.

थरारक क्षण आणि व्हिडीओ

हा संपूर्ण प्रकार काही ग्राहकांच्या समोरच घडला. बँकेबाहेर रांगेत उभ्या असलेल्या लोकांनी सर्पमित्राची ही कारवाई मोबाईलमध्ये शूट केली. सोशल मीडियावर या घटनेचा व्हिडिओ(Video) सध्या प्रचंड व्हायरल होत आहे. या व्हिडिओमध्ये सापाचा संपूर्ण थरार आणि सर्पमित्राचं कसब दिसून येतं.