अक्षय शिंदे, साम टीव्ही

Jalna Viral Video: जालन्यातील जाफराबाद तालुक्यातील गाडेगव्हाण येथील जिल्हा परिषद शाळेतील एक धक्कादायक प्रकार समोर आला आहे. जिथे शाळा सुरू होऊन अवघे काहीच दिवस झाले असताना शिक्षकांच्या हलगर्जीपणाचं हे वास्तव समोर आलं आहे. ज्यामध्ये संबंधित शिक्षक वर्गातच विद्यार्थ्यांसमोर गाढ झोपलेले दिसत आहेत.

या व्हिडिओमध्ये स्पष्टपणे दिसतं की, वर्गात विद्यार्थी बसलेले असून त्या विद्यार्थ्यांपुढेच शिक्षक(Teacher) खुर्चीत झोपलेले आहेत. ही घटना शाळेतीलच एकाने मोबाईलमध्ये शूट केली असून सोशल मीडियावर ती सध्या चांगलीच चर्चेचा विषय ठरली आहे. अनेक पालक, स्थानिक नागरिक तसेच सोशल मीडियावरील वापरकर्ते या घटनेवर नाराजी व्यक्त करत आहेत.

शिक्षक हा विद्यार्थी घडवणारा आणि त्यांच्या आयुष्यावर प्रभाव टाकणारा व्यक्ती असतो. त्याच्या वर्तनावर आणि वागणुकीवरून विद्यार्थी प्रेरणा घेतात. मात्र, अशा वेळी वर्गात शिक्षक विद्यार्थ्यांपुढे झोपलेला दिसतो हे निश्चितच खेदजनक आहे. हा प्रकार शिक्षण व्यवस्थेवर अनेक प्रश्नचिन्ह निर्माण करणारा आहे.

व्हिडिओ सोशल मीडियावर व्हायरल

हा व्हिडिओ(Video) व्हायरल झाल्यानंतर सोशल मीडियावर नागरिकांचा संताप उसळला आहे. अनेकांनी शिक्षण विभागाला टॅग करत कठोर कारवाईची मागणी केली आहे. तर काहींनी असा शिक्षक विद्यार्थ्यांचे भविष्य घडवणार कसा? असा सवाल उपस्थित केला आहे. तर काहींनी यावर टीका करत म्हटलं आहे की, शिक्षक जरच आपली जबाबदारी विसरत असतील, तर शाळांमधील शिस्त आणि गुणवत्ता कशी टिकणार?

टीप: शाळेतील या शिक्षकाचा व्हिडीओ सोशल मीडियावर व्हायरल होत आहे. याची पडताळणी झालेली नाही. फक्त माहिती म्हणून आम्ही वाचक-प्रेक्षकांपर्यंत ही बाब पोहचवत आहोत. याचं आम्ही कोणत्याही प्रकारे समर्थन करत नाही.