छत्रपती संभाजीनगर जिल्ह्यातील जायकवाडी धरणातून मोठा पाण्याचा विसर्ग सुरु करण्यात आला आहे. याचदरम्यान धरणाच्या पायथ्याशी असलेल्या दगडी पुलावरुन चारचाकी गाडी चालवत एका वाहनधारकाने स्टंटबाजी केल्याचा धक्कादायक प्रकार समोर आला आहे. जायकवाडी धरणातातील दगडी पुलावर जीव धोक्यात घालून कार चालवल्याचा शुक्रवारी प्रकार घडला.

जायकवाडी धरण हे ९८ टक्के भरलं आहे. धरणाच्या १८ दरवाजातून तब्बल ७५ हजार क्युसेक पाण्याचा विसर्ग सुरु आहे. या पाण्यामुळे धरणाच्या पायथ्याशी असलेला दगडी पुल पाण्याखाली गेला आहे. या धरणातून प्रचंड वेगाने पाणी या पुलावरुन वाहत आहे. मात्र, पाणी वाहत असतानावाहनधारक चारचाकी वाहन या पुलावरुन चालवित नेत आहे.

पुलाच्या बाजूला असलेल्या जुने कावसन या गावाच्या मार्गावरुन पैठण शहराच्या दिशेने वाहन घेऊन तो येत आहे. दरम्यान, पोलिस आणि धरण प्रशासनाने या पुलावरुन वाहतूक करण्यास बंदी घातली आहे. याबाबतचा सूचनाचा फलक ही सुरक्षिततेसाठी लावला आहे. मात्र या नियमांचे उल्लंघन करुन हा स्टंटबाजीचा प्रकार केला आहे. या ठिकाणी सुरक्षा व्यवस्था कडक करण्यात यावी अशी मागणी होत आहे.

मोबाईलच्या टॉवरवरून उडी मारून तरुणाची आत्महत्या

लातूरच्या अहमदपूर तालुक्यातील गोताळा गावात शंकर माटे या तरुणाने मोबाईल टॉवरवरून उडी मारून आत्महत्या केली आहे. कौटुंबिक वादातून आत्महत्या केल्याची प्राथमिक माहिती समोर येते आहे. उडी मारतानाचा व्हिडिओ सध्या समोर आलाय. तर अधिकचा तपास अहमदपूर पोलीस करत आहेत.