प्रयागराजच्या महाकुंभातून रातोरात प्रसिद्ध झालेल्या मोनालिसाने आपल्या मोहक डोळ्यांनी लाखोंच्या मनावर छाप सोडली आहे. मध्य प्रदेशातील खरगोन जिल्ह्यातील महेश्वर येथे राहणारी १६ वर्षीय मोनालिसा भोसले आपल्या कुटुंबासोबत रुद्राक्ष आणि मोत्यांचे हार विकण्यासाठी महाकुंभात गेली होती. मात्र, तिथे तिच्या तपकिरी डोळ्यांमुळे तिची विशेष ओळख निर्माण झाली. एका फोटोमुळे ती सोशल मीडियावर व्हायरल झाली, ज्यामुळे तिच्या जीवनाला नवीन वळण मिळाले.

सोशल मीडियावरील प्रसिद्धीमुळे मोनालिसाला चित्रपट क्षेत्रात काम करण्याची मोठी संधी मिळाली आहे. दिग्दर्शक सनोज मिश्रा यांनी तिच्या घरी जाऊन तिला चित्रपटाची ऑफर दिली. मोनालिसा सध्या मुंबईत आहे आणि अभिनयाचे धडे घेत आहे. मिश्रा तिच्या अभिनय कौशल्यावर मेहनत घेत असून, ती लवकरच चित्रपटसृष्टीत पदार्पण करणार आहे.

मोनालिसाचा एक व्हिडिओही सध्या जोरदार व्हायरल होत आहे. या व्हिडिओमध्ये ती अनुराधा पौडवाल यांच्या लोकप्रिय गाण्यावर ‘तेरे नैना मेरे नैनो से मिठी मिठी बाते करते है...’ लिप-सिंक करताना दिसते. तिच्या सादरीकरणाने आणि स्टाईलने चाहते भारावून गेले आहेत. व्हिडिओत तिने घातलेल्या सुंदर ड्रेसनेही चाहत्यांचे लक्ष वेधले आहे. तिच्या पहिल्या चित्रपटाबाबत लोकांमध्ये प्रचंड उत्सुकता आहे.

महाकुंभाच्या गर्दीमुळे त्रास झाल्यानंतर मोनालिसाने कुटुंबासोबत महेश्वरला परत जाण्याचा निर्णय घेतला होता. मात्र, आता तिने आपले स्वप्न साकार करण्यासाठी मुंबई गाठली आहे. तिच्या प्रवासाने सोशल मीडियावर प्रेरणादायक कथा निर्माण केली असून, लोक तिच्या यशाचा आनंद साजरा करत आहेत.