अशी कल्पना करा की तुम्ही बाईकवरुन जात असताना अचानक एक बिबट्या तुमच्या दुचाकीला धडकतो. अशीच एक धक्कादायक घटना राजस्थानमधील उदयपूरमध्ये घडली आहे. रहिवासी असलेल्या भागात घुसलेल्या बिबट्याने रस्ता ओलांडताना एका दूधवाल्याच्या दुचाकीला जोरदार धडक दिली. या अपघातात बिबट्या जखमी होऊन जंगलात पळाला, तर दूधवाल्याला स्थानिकांनी तत्काळ मदत केली. बिबट्याच्या अशा अचानक येण्याने लोकांमध्ये खळबळ माजली असून सुरक्षिततेबाबत चिंता व्यक्त होत आहे.

रविवारी रात्री ८ वाजता शिल्पग्राम मेन रोडवर एक अनपेक्षित घटना घडली. रस्ता ओलांडण्याच्या प्रयत्नात असलेल्या बिबट्याची एका दूधवाल्याच्या दुचाकीला जोरदार टक्कर झाली. सीसीटीव्ही व्हिडिओमध्ये दिसते की बिबट्या एका भिंतीवरून उडी मारून रस्त्यावर उतरतो आणि अचानक दुचाकीवर धडकतो. या धडकेत दूधवाला दुचाकीसह काही अंतर ओढला जातो आणि खाली पडतो, तर बिबट्या देखील जखमी होतो. धडकेत दूध रस्त्यावर सांडते, आणि बिबट्या जंगलाच्या दिशेने पळून जातो.

सुदैवाने स्थानिकांनी तत्काळ मदत करत दूधवाल्याला मदत केली. ही घटना सोशल मीडियावर व्हायरल झाली असून नागरिकांमध्ये खळबळ माजली आहे. सीसीटीव्ही व्हिडिओमध्ये दिसते की टक्कर झाल्यानंतर बिबट्या काही सेकंद जमिनीवर निश्चल पडून राहतो. नंतर शुद्धीवर आल्यावर, तो उठतो आणि जंगलाच्या दिशेने पळून जातो. दुसरीकडे, दूधवाला रस्त्याच्या मधोमध जखमी अवस्थेत पडलेला दिसतो. अपघातानंतर लगेचच दोन लोक घटनास्थळी पोहोचतात, पण बिबट्याला पाहताच घाबरून ते मागे सरकतात.

काही वेळानंतर, एका गाडीतील व्यक्तीने धाडस दाखवत दूधवाल्याला रस्त्यावरून उचलून सुरक्षित ठिकाणी हलवले. हा थरारक व्हिडिओ सोशल मीडियावर प्रचंड व्हायरल झाला आहे. व्हिडिओ ट्विटरवर @KapilShrimali नावाच्या अकाउंटवरून शेअर करण्यात आला आहे आणि अनेक प्लॅटफॉर्मवर उपलब्ध आहे. या व्हिडीओला आतापर्यंत १ हजारपेक्षा अधिक व्ह्यूज गेले आहेत.