टीम इंडियाचा स्टार खेळाडू कुलदीप यादव आज मसूरीमध्ये लग्नबंधनात अडकणार आहे. कुलदीप त्याची होणारी बायको वंशिकासोबत सात फेरे घेणार आहे. त्यापूर्वी भारतीय टीममधील काही खेळाडू त्याच्या लग्नाच्या विधीमध्ये सहभागी झाले होते. युजवेंद्र चहल आणि रिंकू सिंग यांच्यासह अनेक जण कुलदीपच्या लग्नाला उपस्थित राहण्यासाठी पोहोचलेत. दरम्यान शुक्रवारी हळदी समारंभात चहलचा एक मजेशीर व्हिडीओ व्हायरल होतोय. हा व्हिडिओ इंस्टाग्रामवर शेअर केला आहे.

सोशल मीडियावर युझीने शेअर केला व्हिडीओ

व्हिडिओमध्ये युजवेंद्र चहल कुलदीपला हळद लावताना दिसतोय. चहल त्याच्या मजेशीर अंदाजासाठी नेहमी चर्चेत असतो. तो याठिकाणी विनोद करण्याची एकही संधी सोडत नाही. हळद लावल्यानंतर तो कुलदीपच्या पाय पडतो. त्यानंतर तो कुलदीपसोबत फोटो काढतो.

त्यानंतर चहलने वंशिकालाही हळद लावली. २०२० पूर्वी एक काळ असा होता ज्यावेळी कुलदीप आणि चहलची जोडी आंतरराष्ट्रीय क्रिकेटची एक वेगळीच ताकद होती. दोघंही टी-२० क्रिकेटमध्ये भारतासाठी मॅचविनर होते. त्यांची स्पिन जोडी कुलचा म्हणून ओळखली जायची.

२०१९ च्या इंग्लंडमधील वर्ल्डकप दरम्यान कुलदीप आणि चहलची ही जोडी तुटली. तेव्हापासून ते क्वचितच भारतासाठी एकत्र खेळलेत. दोघांनाही टीममधून वगळण्यात आलं. यावेळी चहलला कमबॅक करता आलं नाही. दुसरीकडे कुलदीप सातत्याने तिन्ही फॉर्मेटचा भाग राहिला आहे. तो २०२६ च्या टी-२० वर्ल्डकपसाठी देखील टीम इंडियाचा भाग होता. परंतु त्याने फक्त एकच सामना खेळला.

दोघंही खेळाडू आयपीएल खेळणार

टी-२० वर्ल्डकप जिंकल्यानंतर भारतीय खेळाडू २०२६ च्या इंडियन प्रीमियर लीगमध्ये खेळताना दिसतील. कुलदीप यादव आयपीएलमध्ये दिल्ली कॅपिटल्सकडून खेळणार आहे. तर युजवेंद्र चहल पंजाब किंग्जकडून मैदानात उतरणार आहे. चहल आयपीएलमध्ये सर्वाधिक विकेट घेणारा गोलंदाज देखील आहे. २०० पेक्षा जास्त विकेट घेणारा तो एकमेव गोलंदाज आहे. तर कुलदीपने १०२ विकेट घेतल्या आहेत.