मुंबई : आईस्क्रीम खायला कुणाला आवडत नाही. चॉकलेटपासून ते सीताफळापर्यंत अगदी मलई कुल्फीपासून ते पिस्ता फ्लेव्हरपर्यंत बाजारात आइसक्रीमचे शेकडो प्रकार उपलब्ध आहेत. आपल्यापैकी अनेकजण आइसक्रीमचे बेहद्द शौकीन असतात. पण हा व्हायरल मेसेज पाहिल्यानंतर तुमच्या तोंडचं पाणीच पळून जाईल. या मेसेजमध्ये तुमची आवडती आईस्क्रीम आरोग्यासाठी किती घातक आहे हे सांगण्यात आलंय. व्हायरल मेसेजमध्ये नेमकं काय म्हंटलंय पाहा

तुम्ही वारंवार आईस्क्रीम खात असाल तर तुमच्यासाठी ते अत्यंत घातक आहे. आईस्क्रीममुळे केवळ सर्दी खोकला होत नाही, तर हार्ट अटॅकही येऊ शकतो. जे लोक जास्त प्रमाणात आईस्क्रीम खातात त्यांना डायबिटीज होऊ शकतो.

आईस्क्रीम तर सारेच जण खातात. हल्ली सगळीकडेच आईस्क्रीमच्या बड्या फ्रेंचांयझी पाहायला मिळतात. तिथे आईस्क्रीमसाठी लोकांची रांग लागलेली असते. हा विषय लोकांच्या आरोग्याशी निगडीत असल्यानं याबाबत आरोग्यज्ज्ञ अधिक माहिती देऊ शकतात. आम्ही त्यांना हा मेसेज दाखवला आणि मेसेजबाबतच तथ्य जाणून घेतलं.

आईस्क्रीममध्ये सॅचुरेटेड फॅट असतं. आईस्क्रीम बनवताना साखरेचा खूप जास्त वापर केला जातो. हे कॉम्बिनेशन ह्रदयासाठी हानिकारक आहे. जास्त प्रमाणात आईसक्रीम खाल्ल्यास वजन वाढतं. शिवाय टाईप 2 डायबिटीज होण्याचा धोका आहे. दूध, पनीर आणि दही चांगल्या आरोग्यासाठी उपयुक्त आहेत. मात्र लोणी, क्रीम आईस्क्रीम ह्रदयासाठी अयोग्य आहेत. यामुळे तुमचा कोलेस्ट्रॉल वाढू शकतो. अमेरिकन हार्ट असोसिएशनं फॅट विरहित आईस्क्रीम खाण्याचा सल्ला दिलाय. चॉकलेट, लॉली, आणि कस्टर्ड सारख्या उत्पादनांमध्ये साखरेचं प्रमाण अधिक असतं.

त्यामुळे आमच्या पडताळणीत खूप जास्त प्रमाणात आईस्क्रीम खाल्ल्यानं हार्ट अटॅकचा धोका असल्याचा दावा सत्य ठरलाय. कधीतरी आईस्क्रीम खायला हरकत नाही. मात्र आईस्क्रीम खाण्याचा अतिरेक तुम्हाला महागात पडू शकतो.