अभिजीत देशमुख, साम टीव्ही

मुंबई : मुंबईतील लोकल ट्रेनने गर्दीच्या वेळेत प्रवास करणे फार जिकरीचे होत चालले आहे. प्रवाशांना लोकल ट्रेनने संध्याकाळी घरी जाताना चक्क दरवाजाला लटकून प्रवास करावा लागतो. गर्दीच्या वेळेत लोकलच्या डब्यात नीट उभे राहण्यासाठीही जागा नसते. यामुळे अनेक प्रवाशांना उभं राहूनच प्रवास करावा लागतो. प्रवाशांनी खचाखच भरलेल्या गर्दीतून प्रवास करणे मुंबईकरांसाठी एक आव्हान बनत चाललं आहे. याच लोकल ट्रेनने चक्क एका बकरीने प्रवास केल्याचे समोर आलं आहे. एका प्रवाशाने बकरीला घेऊन लोकल ट्रेनने प्रवास केला. या बकरीचा लोकल प्रवास सोशल मीडियावर प्रचंड व्हायरल होत आहे.

लोकल ट्रेन म्हणजे मुंबईकरांची 'लाईफलाईन'. रोज लाखो प्रवासी प्रचंड गर्दीत प्रवास करतात. पण या लोकल ट्रेनमधील माल डब्यामध्ये सध्या बकऱ्यांचा प्रवास होतोय. सोशल मीडियावर एक व्हिडिओ मोठ्या प्रमाणात व्हायरल होतोय. याममध्ये एका व्यक्तीने कुर्ला स्थानकावरून कल्याणकडे जाणाऱ्या ट्रेनने प्रवास केला. या प्रवाशाने सायंकाळी सहा वाजून आठ मिनिटांच्या लोकल ट्रेनमध्ये बकरीसोबत प्रवास केला.

कुत्र्याचा लोकल ट्रेनने प्रवास

काही दिवसांपूर्वी एका कुत्र्याने लोकल प्रवास केला होता. प्रवाशांनी गच्च भरलेल्या लोकलच्या डब्ब्यात एक प्रवासी महिला कुत्र्याला सोबत घेऊन चढली होती. या प्रवासी महिलेने आपल्या बॅगेत कुत्र्याला ठेवलेले होते. महिलेने सोबत आणलेल्या कुत्र्याकडे लोकलमधील प्रवासी मोठ्या उत्सुकतेने पाहत होते. लोकलमध्ये प्रवाशांना लवकर उभं राहायला जागा मिळत नाही, त्याच लोकलमध्ये एका कुत्र्याने सुखरुप प्रवास केलाय. या कुत्र्याचा व्हिडिओ सोशल मीडियावर तुफान व्हायरल होत आहे.