हरियाणातील सोनीपतमध्ये असलेल्या ओपी जिंदल ग्लोबल युनिव्हर्सिटीमध्ये विद्यार्थिनींनमध्ये झालेल्या जोरदार मारामारीचा एक व्हिडिओ सध्या सोशल मीडियावर मोठ्या प्रमाणात व्हायरल होत आहे. सुमारे 23 सेकंदांचा हा व्हिडिओ कॅम्पसमधील मेसमध्ये झालेल्या वादाचा असल्याची माहिती आहे. या व्हिडिओमध्ये काही विद्यार्थिनी एकमेकींना लाथा-बुक्क्यांनी मारताना, केस ओढताना आणि कानाखाली मारताना दिसतायत.

मिळालेल्या माहितीनुसार, दोन गटांतील विद्यार्थिनींमध्ये अचानक वाद सुरू झाला आणि तो काही क्षणांतच हाणामारीपर्यंत पोहोचला. व्हिडिओमध्ये एक विद्यार्थिनी दुसऱ्या विद्यार्थिनीचे केस पकडून जोरात ओढताना दिसतेय. त्याच वेळी ती तिला कानाखाली मारत असल्याचंही दिसून येतंय. या घटनेदरम्यान इतर काही विद्यार्थिनी वाद सोडवण्याचा प्रयत्न करताना दिसतात. मात्र काही वेळाने पुन्हा दोन्ही गटांमध्ये मारामारी सुरू झाल्याचं व्हायरल झालेल्या व्हिडीओमध्ये दिसून येतंय.

वाद वाढल्यानंतर कॅम्पसमधील बॉडीगार्ड घटनास्थळी पोहोचले होते. यावेळी त्यांनी विद्यार्थिनींना मारहाण करण्यापासून रोखलं. बॉडीगार्डने मध्यस्थी केल्यानंतर काही वेळातच हा वाद शांत झाला.

या प्रकरणाबाबत विद्यापीठ प्रशासनानेही प्रतिक्रिया दिली आहे. युनिव्हर्सिटीच्या पीआरओ अंजू मोहन यांनी सांगितलं की, विद्यार्थिनींमध्ये आपापसातील वाद झाला होता. कॅम्पसमध्ये सुमारे 11 हजार विद्यार्थी शिकतात. इतक्या मोठ्या परिसरात कधी-कधी अशा वादाच्या घटना घडू शकतात. हा वाद विद्यार्थिनींमध्येच आपापसात सोडवण्यात आला असून या प्रकरणात पोलिसांकडे कोणतीही तक्रार दाखल करण्यात आलेली नाही.