व्हायरल होत असलेल्या बातम्यांची आम्ही पडताळणी करतो.आणि सत्यता समोर आणतो. आता असाच एक व्हिडिओ व्हायरल होतोय. त्या व्हिडिओत स्वत: मोदी आता 1 तोळं सोनं मोफत देणार असल्याचं सांगतायत. पण, खरंच या व्हिडिओत तथ्य आहे का.? याची आम्ही पडताळणी केली.त्यावेळी काय सत्य समोर आलं पाहुयात.

हा व्हिडिओ ऐकलात. स्वत: पंतप्रधान मोदीच सांगतायत की सोनं महाग असूनही आधारकार्डवर 1 तोळा सोनं सरकार मोफत देणार आहे. मोदी ही घोषणा करतानाचा व्हिडिओ व्हायरल होतोय...पण, घरात कुणीही सरकारी नोकरदार नसावा अशी अट असल्याचं सांगण्यात आलंय. मात्र, सरकार खरंच 1 तोळं सोनं देतंय का? सरकार मोफत सोनं का देतंय? अशीच चर्चा सगळीकडे सुरू आहे.

इन्टाग्रामवर संजय अन्नू साहू नावाच्या एका युजरने हा व्हिडिओ अपलोड केलाय. या व्हिडिओत स्वत: मोदीच घोषणा करत असल्याचं दिसतंय. त्यामुळे अनेकांना यावर विश्वास बसू लागलाय...खरंच मोदी सरकार आता मोफत सोनं देणार आहे का.?

सध्या सोन्याचा दर 1 लाख 35 हजारांपेक्षा जास्त आहे.तरीही एवढं महाग सोनं सरकार लोकांना का देणार आहे.? आणि खरंच सरकार सोनं देत असेल तर ते कसं मिळवायचं.? असे अनेक प्रश्न उपस्थित झालेयत.त्यामुळे आम्ही याची पडताळणी सुरू केली. याबाबत आम्ही सरकारकडूनच माहिती मिळवली. त्यावेळी काय सत्य समोर आलं पाहुयात.

व्हायरल सत्य/ साम इन्व्हिस्टिगेशन

मोफत एक तोळं सोनं सरकार देणार नाही

सरकारची अशी कोणतीही योजना नाही

पंतप्रधान मोदींचा व्हिडिओ AI निर्मित

मोफत सोन्यासाठी कोणताही अर्ज भरू नका

अर्ज भरण्याच्या नावाने तुमची फसवणूक होऊ शकते

सध्या सोनं चांदी प्रचंड महागलंय. गरिबांना ते घेणं परवडणारंही नाही. त्यामुळे असे मेसेज, व्हिडिओ व्हायरल केले जातायत. लोकांना खरं वाटावं म्हणून मोदींचाच व्हिडिओ व्हायरल करण्यात आलाय. आणि आवाज AIच्या माध्यमातून लावण्यात आलाय. त्यामुळे अशा भूलथापांना बळी पडू नका. खोटी आमिष दाखवून तुमची फसवणूक होऊ शकते.आमच्या पडताळणीत सरकार 1 तोळा सोनं देणार असल्याचा दावा असत्य ठरलाय.