बारामती विमान अपघातानंतर सोशल मीडियात चर्चांना उधाण आलंय. नेटीझन्स या अपघाताशी संबंधित व्हिडीओ आणि फोटो पोस्ट करतायेत. अशातच या विमानाचे पायलट कॅ.सुमीत कपूर यांचाही एक फोटो व्हायरल होतोय. मात्र अनेकांनी हा कॅ.सुमीत कपूर यांचा फोटो नसल्याचा दावा केलाय. या फोटोवरून नेटीझन्समध्ये गोंधळाचं वातावरण आहे. त्यामुळे व्हायरल फोटो कॅ.सुमीत कपूर यांचा आहे की आणखी कुणाचा? असा सवाल उपस्थित होतोय. साम टीव्हीनं या फोटोची पडताळणी केली, मात्र त्याआधी व्हायरल पोस्टमध्ये नेमका काय दावा करण्यात आलाय पाहूयात..

व्हायरल मेसेज

बारामती विमान दुर्घटनेत उपमुख्यमंत्री अजित पवार यांच्यासोबत कॅप्टन सुमित कपूर आणि शांभवी पाठक यांचा दुर्दैवीरित्या मृत्यू झालाय. अनुभवी पायलट कॅ.सुमित कपूर यांनी दाखवलेलं शौर्य व्यर्थ गेलं.

या पोस्टसोबत कॅप्टन सुमीत कपूर आणि शांभवी पाठक यांचा फोटोही व्हायरल करण्यात आलाय. मात्र अनेकांनी हा फोटो सुमीत कपूर यांचा नसल्याचं म्हंटलंय. त्यामुळे आम्ही या फोटोची पडताळणी केली. आम्ही या पोस्टवरील कमेंटस तपासून पाहिल्या. तसच व्हायरल फोटो रिव्हर्स सर्च केला. त्यावेळी आमच्या पडताळणीत काय सत्य समोर आलं पाहा...

व्हायरल फोटो कॅप्टन सुमीत कपूर यांचा नाही. हा फोटो साहिल मदान यांचा आहे. साहिल मदान हेही VSR वेंचर्स प्रायव्हेट कंपनीत काही काळ कार्यरत होते. त्यांची पत्नी संजम साहनी यांनी व्हायरल फोटो आपल्या पतीचं असल्याचं सांगितलंय. अपघातावेळी आपले पती विमानात नव्हते. या पोस्टमुळे आम्हाला कठीण परिस्थितीतून जावं लागतंय असही त्यांनी सांगितलंय.

28 जानेवारीला बारामतीत झालेल्या विमान दुर्घनेत उपमुख्यमंत्री अजित पवार यांच्यासह पाच जणांचा मृत्यू झाला. या अपघातात विमानाचे पायलट कॅ. सुमीत कपूर यांनाही जीव गमवावा लागला. मात्र आमच्या पडताळणीत सोशल मीडियात कॅ.सुमीत कपूर यांच्या नावाने व्हायरल होत असलेला फोटा त्यांचा असल्याचा दावा असत्य ठरलाय. हो फोटो त्यांचा नसून दुसऱ्या व्यक्तीचा असल्याचं स्पष्ट झालंय. त्यामुळे तुम्ही खात्री झाल्याशिवाय अशा पोस्ट व्हायरल करू नका.