छत्रपती संभाजीनगर जिल्ह्यातील एका गावात बैलपोळा सणाच्या दिवशी धक्कादायक प्रकार घडला आहे. सायंकाळी बैलपोळा कार्यक्रमानिमित्त बैल अचानक उधळ्याने सर्वत्र गोंधळ उडाला आहे. यावेळी अत्यंत गंभीर परिस्थिती निर्माण झाल्याने सर्वच घाबरले होते. बैलाने धुमाकूळ घातला होता यात दोन शेतकऱ्यांसह एक बैल देखील गंभीर जखमी झाला आहे. बैलासह दोन शेतकऱ्यांवर सध्या उपचार सुरू आहेत.

छत्रपती संभाजीनगर जिल्ह्यातील हतनुर येथे दरवर्षी बैलपोळा सण मोठ्या उत्साहात साजरा करतात. बैलपोळा सणानिमित्त गावातील सर्व शेतकरी आपापल्या बैलाची सजावट करून गावातील वेशीजवळ आणतात. याचदरम्यान काल बैल उधळल्याचा प्रकार झाला आहे. यावेळी वैभव कैलास कोतकर या शेतकऱ्याचा खिल्लार बैल अचानक उधळला. बैल उलटसुलट फिरू लागला. जोरात उड्या मारत गावाच्या वेशीत बैलासह उभ्या असलेल्या शेतकऱ्यांच्या जमावाकडे शिरत अनेकांना मारत सुटला.

उधळलेल्या बैलाने जवळच असलेल्या संरक्षण भिंतीवरुन उडी मारली. यावेळी भिंतीच्या कठड्यात बैलाचे मागचे पाय अडकले आणि तो बैल डोक्यावर पडला. त्यात बैलाचे समोरचे दोन्ही पाय मोडले असल्याची माहिती आहे. या घडलेल्या घटनेत समर्थ ज्ञानेश्वर म्हस्के (१२) ज्ञानेश्वर नामदेव झरेकर (३८) दोघे रा.हतनुर) हे दोघे शेतकरी देखील जखमी झाले आहे.