गुजरात, ता. १६ मे २०२४

सध्याची तरुणाई प्रत्येक गोष्ट सोशल मीडियावर शेअर करण्यासाठी धडपडत असते. सोशल मीडियावर अल्पावधीत फेमस होण्यासाठी, चर्चेत येण्यासाठी आणि लाईक, व्हिव्यूज मिळवण्यासाठी तरुण - तरुणी काहीही करायला तयार असतात.

मात्र अनेकदा त्यांचे हे थरारक स्टंट जीवघेणेही ठरु शकतात. असाच एक धक्कादायक अपघाताचा व्हिडिओ सध्या सोशल मीडियावर व्हायरल होत आहे. इंस्टाग्राम लाईव्ह करत सुसाट कार चालवताना झालेल्या या अपघातात २ तरुणांचा मृत्यू झाल्याचे सांगण्यात येत आहे.

याबाबत समोर आलेल्या माहितीनुसार, अहमदाबादवरुन पाच तरुण ब्रिझा कारने मुंबईच्या दिशेने निघाले होते. प्रवास सुरू असतानाच या तरुणांनी इंस्टाग्राम लाईव्ह करण्याचे ठरवले. गाणी, मस्ती, धिंगाणा अशी मजामस्ती करत या तरुणांचा प्रवास सुरू होता. आपले सोशल मीडियावरील फॉलोअर्स, चाहते, मित्रपरिवाराला दाखवण्यासाठी या तरुणांनी गाडीचे स्पीड वाढवले.

बघा मित्रांनो कार किती वेगात पळते असे म्हणत लाईव्ह करणाऱ्या तरुणाने गाडीचे स्पीड १६० किमी असल्याचे दाखवले. मात्र गाडीचा हाच वाढता वेग भीषण अपघाताचे कारण ठरला. येणा- जाणाऱ्या गाड्यांना ओव्हरटेक करत गाडी चालवणारा मुलगा मस्ती करत असतो. अशातच त्याचे नियंत्रण सुटते अन् गाडीचा भयंकर अपघात होतो.

या दुर्दैवी घटनेत अमन मेहबुबभाई शेख आणि चिरागकुमार के. पटेसल या दोघांचा मृत्यू झाला आहे. तर गाडीमधील तीन तरुण गंभीर जखमी झाले असून त्यांच्यावर सध्या रुग्णालयात उपचार सुरू आहेत. दरम्यान, या धक्कादायक घटनेचा व्हिडिओ सध्या सोशल मीडियावर व्हायरल होत आहे, ज्यावर नेटकऱ्यांनीही जोरदार प्रतिक्रिया दिल्यात. अनेकांनी असे जीवघेणे स्टंट न करण्याचा सल्ला दिला आहे.