अजित पवार यांच्या गटात आज जोरदार इनकमिंग होत आहे. बाबा सीद्दिकी यांचे पुत्र झिशान सीद्दिकी यांचा आज अजित पवार यांच्या गटात पक्ष प्रवेश होणार आहे. कॉंग्रेसमधून ते राष्ट्रवादी अजित पवार गटात प्रवेश करत आहेत. याच बरोबर संजयकाका पाटील आणि निशिकांत पाटील यांचा देखील आज पक्ष प्रवेश झाला आहे. यासाठी उपमुख्यमंत्री अजित पवार, प्रदेशाध्यक्ष सुनील तटकरे, सदाभाऊ खोत यांच्यासह पदाधिकारी उपस्थित आहेत.

विधानसभा निवडणुकीच्या रणधुमाळीला सुरुवात झाली आहे. या निवडणुकीच्या पार्श्वभूमीवर सध्या अनेक नेते एका पक्षातून दुसऱ्या पक्षात प्रवेश करत असल्याचं पाहायला मिळत आहे. आज भारतीय जनता पक्षाचे नेते तथा सांगलीचे माजी खासदार संजय काका पाटील यांनी भाजपाला सोडचिठ्ठी देत राष्ट्रवादी काँग्रेस अजित पवार पक्षात प्रवेश केला आहे. माजी खासदार संजयकाका पाटील हे तासगाव -कवठेमहांकाळ विधानसभा मतदारसंघात राष्ट्रवादी काँग्रेस अजित पवार पक्षाकडून विधानसभा निवडणूक लढवणार आहेत. त्यामुळे आता या मतदारसंघात माजी खासदार संजयकाका पाटील आणि रोहित पाटील यांच्यात लढत होणार आहे. तर बाबा सीद्दिकी यांचे पुत्र झिशान सीद्दिकी यांनी देखील आज अजित पवार गटात प्रवेश केला आहे. नाशिकमध्ये कल्याणराव पाटील यांनी राष्ट्रवादी अजित पवार गटात प्रवेश केल्याने नाशिकमध्ये अजित पवार यांना फायदा होण्याची शक्यता आहे. निशिकांत पाटील यांनी देखील आज अजितदादांच्या गटात प्रवेश केल्याने आता या सगळ्या नेत्यांच्या इनकमिंगचा नेमका कसा फायदा अजित पवार यांना होईल हे पाहाणं आगामी काळात महत्वाचं ठरेल.

Edited By Rakhi Rajput