पुणे महापालिका निवडणुकीत अजित पवारांची राष्ट्रवादी काँग्रेस आणि भाजप यांच्यात चुरस पाहायला मिळत आहे. दुसरीकडं या निवडणुकीच्या निमित्तानं राज्यात महायुती सरकारमध्ये एकत्र असलेले मुख्यमंत्री देवेंद्र फडणवीस आणि उपमुख्यमंत्री अजित पवार यांच्यात जोरदार वाकयुद्ध सुरू झालं. हे दोन्ही नेते एकमेकांवर टीका-प्रतिटीका करत आहेत.

पुणे महानगरपालिकेच्या निवडणुकीच्या पार्श्वभूमीवर मुख्यमंत्री देवेंद्र फडणवीस आणि उपमुख्यमंत्री अजित पवार आमनेसामने आले आहेत. अजित पवारांनी दिलेल्या आश्वासनावर 'खिशात नाही आणा आणि मला बाजीराव म्हणा', असं फडणवीस म्हणाले होते. फडणवीसांच्या या टीकेला अजित पवारांनी प्रत्युत्तर दिलं.

“होय, मी बाजीरावच आहे,” असं अजित पवार म्हणाले. मेट्रो आणि बस प्रवास मोफत हा पुणेकरांचा हक्क असल्याचं अजित पवार यांनी स्पष्ट केलं. तत्पूर्वी, खिशात नाही आणा आणि मला बाजीराव म्हणा, असा टोला फडणवीसांची अजित पवारांनी दिलेल्या आश्वासनानंतर लगावला होता. त्याला अजित पवारांनी थेट उत्तर देत आपली भूमिका स्पष्ट केलीय. या जुगलबंदीमुळे पुण्याच्या राजकारणात चांगलीच खळबळ उडाली आहे.